İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 191 Hüküm no: 154 Orijinal metin no: [19b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nimetullah bt. Eyüb’ün Mustafa b. Abdullah aleyhindeki dükkân kirası davası ve gedik anlaşmazlığında sulh olmaları Odunkapısında tabancacı dükkânı nizâ‘ı Ma‘rûz Sâhibe-i arzuhâl Âsitâne-i aliyye’de hısnı ebvâbından Odunkapısı dâhilinde vâki‘ bir bâb tabancacı dükkânının mutasarrıfesi mu‘arrefetü’z-zât Nimetullah bt. Eyüb meclis-i şer‘-i münîrde müsteciri Mustafa b. Abdullah tarafından Osman Ağa b. Mustafa ve Ömer b. Hasan şehâdetleriyle vekâleti sâbit es-Seyyid Mustafa Ağa b. Ali muvâcehesinde dükkân-ı mezkûr icâresinden dokuz mâhda beher şehr yüz paradan olmak üzere işbu bin iki yüz yirmi iki senesi Rebî‘ülevveli gurresinden sene-i mezbûre Zilka‘desi gāyetine değin merkūmun zimmetinde müctemi‘a yirmi iki buçuk guruş alacak hakkım vardır deyü da‘vâ vekîl-i merkūm dahi ba‘de’l-ikrâr ve’l-hüküm meblağ-ı merkūm yirmi iki buçuk guruşu edâya ba‘de’t-tenbîh işbu hâzır bi’l-meclis Ömer Beşe b. Hasan dükkân-ı merkūmun icâresi olan beher şehr yüzer parayı edâsına kefîl oldukdan sonra vekîl-i merkūm es-Seyyid Mustafa Ağa dükkân-ı merkūmun mutasarrıfesi mezbûre Nimetullah muvâcehesinde ikrâr-ı tam eder ki müvekkilim merkūm Mustafa bundan akdem dükkân-ı merkūme muhterik olduğu [20a] esnâda seksen guruş binâsına zam ile masrûfum olduğuna binâen gedik da‘vâsına şürû‘ etmiş idi. El-hâletü hâzihî zikr olunan dükkân gediği Başmuhâsebe’de mukayyed gediklerden olmayıp boş gedik da‘vâsı sadedinde olup müvekkil-i mezbûr gedik da‘vâsından meccânen fâriğ olmağın meblağ-ı mezbûr dükkân-ı merkūme masrûfu olan seksen guruşdan mezbûre Ni‘metullah Hatun’un zimmetini ibrâ-yı âm ile ibrâ, ol dahi ibrâyı kabûl edip bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu].