İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 192 Hüküm no: 155 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Yazıcı’nın buğday bedelinden Kozlucalı Salih Ağa aleyhindeki alacak davasında anlaşma sağlanması 450 guruşa sulh Ma‘rûz Sâhib-i arzuhâl Kapan-ı dakīk tüccârından Mehmed Yazıcı b. Hüseyin meclis-i şer‘-i münîrde Havâss-ı refî‘a muzâfâtından Hasköy’de müsâfiren sâkin derûn-ı arzuhâlde mezkûrü’l-ism Kozlucalı Salih Ağa b. Mehmed tarafından Ali Ağa b. Ali ve Fazlı Ağa b. İbrahim şehâdetleriyle vekâleti sâbit olan es-Seyyid Ahmed Efendi b. es-Seyyid Ali muvâcehesinde müvekkil-i merkūm Salih Ağa bin iki yüz on senesinde bâ-emr-i âlî Kozluca kazâsından Âsitâne-i aliyye sekenesinin akvât-ı yevmiyeleri için matlûb buyurulan hınta sürsadı mübâya‘ası için Rumeli kilesinin beher keylini dörder guruşa olmak üzere merkūm Salih Ağa ile fiyâtını kat‘ ve malımdan dört bin guruş merkūma tamamen teslîm, ol dahi ahz ü kabz edip bir def‘a bana teslîm eylediği altı yüz seksen altı kile bir şinik hıntanın beher keyli dörder guruşdan cem‘an iki bin yedi yüz kırk beş guruş sekiz para ile vekîlim Adalı Hasan Reis’e, bir def‘a dahi teslîm eylediği dört yüz kırk iki guruşluk hınta ve yüz guruş mesârifi zam olundukda cem‘an üç bin iki yüz seksen yedi guruş hesâba mahsûb olunup bâkī yedi yüz on iki guruş zimmetinde alacak hakkım olmağla taleb ederim deyü da‘vâ ve beynimize muslihûn tavassutuyla ben tasaddî eylediğim da‘vâ-yı mezkûremden müvekkil-i merkūm ile dört yüz elli guruş bedel-i makbûza sulh olup mâ‘adâya ve sâire müte‘allika âmme-i da‘vâdan müvekkil-i merkūm Salih Ağa’nın zimmetini ibrâ-yı âmm-ı sahîh-i şer‘î ile ibrâ ve iskāt eylediğimde, vekîl-i merkūm dahi ibrâ-yı mezkûrumu kabûl eyledi deyü ikrâr ve tasdîkleri İstanbul Mahkemesi’nden huzûr-ı [âlîlerine i‘lâm olundu]. Fî 6 Z sene 1222.