İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 196 Hüküm no: 160 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nakkaş Esnafının, Kundakçı esnafına ödemedikleri iki senelik imdadiyelerini ödemeleri ve ellerindeki muafiyetname kaydının silinmesi Nakkāş esnâfına dâir Ma‘rûz “Arzuhâl ve derkenâra nazar ve şurût-ı nizâm-ı kadîme tatbîk ile muktezâsını i‘lâm eyleyesiz” deyü bu dâ‘îlerine hitâben sâdır olan işbu fermân-ı âlîlerine imtisâlen Kundakçıbaşı Mehmed Tâhir Ağa ve Kethudâ Hasan Ağa ve Yazıcı Molla Mahmud ve Ebûbekir ve İsmail ve Süleyman ve Molla Mehmed ve Yiğitbaşı Süleyman ve sâir bi’l-cümle kundakçı esnâfı meclis-i şer‘-i enverde nakkāş esnâfı taraflarından vekîlleri olan yiğitbaşıları es-Seyyid Süleyman Ağa muvâcehesinde şurût-ı nizâm-ı kadîmemiz üzere nakkāş esnâfı işbu derkenâr mûcebince bizlere yamak kayd olunup ve esfâr-ı sâbıkālarda iktizâ eden imdâdiyelerini bilâ-ta‘allül bizlere edâ edegelmişler iken geçen sene-i mübârekede iki hayme ile ordumuz ihrâç olundukda iktizâ eden imdâdiyeleri taleb eylediğimizde gûnâ-gûn ta‘allül ile muhâlefet ve bu sene-i mübârekede bir dürlü vermeyiz deyü kat‘î cevâb vermeleriyle iki senede terâküm eden sekiz bin akçenin tahsîl ve orducumuza teslîm olunması matlûbumuzdur deyü istid‘â eylediklerinde, Yiğitbaşı-yı merkūm cevâbında kaziyye minvâl-i meşrûh üzere olduğunu bi-tamamihi ikrâr ü i‘tirâf edip, lâkin bizler Saray-ı hümâyûn’da hizmet eder makūleden olduğumuzdan mâ‘adâ yedimizde mu‘âfiyetimizi hâvî emir vardır deyü ibrâz eyledikleri emrin kaydı atik olduğundan gayrı ez-kadîm mûcebiyle amel olunagelmediğinden mâ‘adâ bu vesîle ile vermemek lâzım gelir ise her bir esnâf umûr-ı mühimme hizmetinde istihdâm olunmalarını vesîle tutdukları sûretde sâire sirâyet ile külliyen ihtilâl-i nizâmı mûcib olacak bir keyfiyet olmağla amel-i kadîme ri‘âyete [ve] terâküm eden iki senelik sekiz bin akçe i‘âneleri kundakçı esnâfına tamamen teslîm ve amel-i kadîme mugāyir ibrâz eyledikleri atik emrin kaydı ref‘ ü terkīn ve kundakçı esnâfına yamak oldukları kaydı bâlâsına şerh ve yedlerine sûret i‘tâsı iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 22 Z sene 1222.