İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 197 Hüküm no: 161 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiryako v. Zaharya’nın icarında olan ve yanması nedeniyle yeniden inşa ettirdiği bakkal dükkânından mal sahipleri Hacı Mustafa Allâme ve sairlerine kira borcundan olan meblağı ödemesi Kırk dört Kapısı’nda bakkāl gediği mâddesi, Ma‘rûz Mübârek rikâb-ı kamer-tâb-ı hüsrevânîye takdîm-i arzuhâl eden bakkāl tâifesinden Kiryako v. Zaharya zimmî Çarşamba günü Arz Odası’nda huzûr-ı hazret-i kāimmakām-ı âlî-makāmda ma‘kūd meclis-i şer‘-i münîrde derûn-ı arzuhâlde mezkûrü’l-ism Mektûbî-yi sadr-ı âlî hulefâsından el-Hâc Mustafa Allâme b. el-Hâc Mehmed Efendi tarafından Mehmed Emin Ağa b. İsa ve es-Seyyid Mehmed Emin b. Emin şehâdetleriyle vekâleti sâbit olan el-Hâc İsmail Ağa b. Halil muvâcehesinde İstanbul’da Kırkdört Kapısı kurbünde Çukurçeşme nâm mahâlde vâki‘ bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmeye mâlik olmamla ber-vech-i iştirâk rub‘ ve nısf-ı rub‘u hissesinin mutasarrıfesi sagīre Hadice Hanım tasarruflarında olan dükkân-ı merkūmda beher şehr altı guruş otuz para icâre ile müstecirleri olduğum ahyânda bi-kazâillâhi te‘âlâ dükkân-ı mezkûr muhterik olmağla ibâdullâha lüzûmu olduğuna binâen inşâsına müvekkil-i mûmâ-ileyh kendi nefsinden asâleten ve hemşîresi mûmâ-ileyhâ Âişe Hanım tarafından vekâleten ve sagīre-i mezbûre Hadice Hanım tarafından vesâyeten izin ve ruhsat-ı kâmile ve her ne mikdâr meblağ sarf olunur ise edâ ve teslîm ederim deyü bi-şarti’r-rücû‘ emretmekle ben dahi emrine binâen inşâsına şürû‘ eylediğim esnâda bana yüz elli guruş ale’l-hesâb ber-vech-i peşîn teslîm ve mâ‘adâ masrûfumu edâ etmek üzere müte‘ahhid olmuş iken dükkân-ı mezkûrun inşâsına mübâşeret ve bin üç yüz guruş mesârif-i sahîham olmakla, bana teslîm eylediği meblağ-ı merkūm yüz elli guruş ba‘de’l-ihrâç bâkī bin yüz elli guruş müvekkil-i mûmâ-ileyh zimmetinde alacak hakkım olup taleb eylediğimde edâdan imtinâ‘ eylediğinden mâ‘adâ mârrrü’z-zikr dükkânın icâre-i kadîmesi olan beher şehr altı guruş otuz para icâre üzerine bi-gayrı vechin yüz elli para dahi zam ile on buçuk guruş taleb etmeğin kadîmî icâresi olan altı guruş otuz paraya tenzîline şer‘an tenbîh olunması ve meblağ-ı merkūm bin yüz elli guruşu müvekkil-i mûmâ-ileyhden taleb ederim deyü ba‘de’d-da‘vâ ve’l-istintâk vekîl-i merkūm cevâbında müvekkil-i mûmâ-ileyh tasarrufunda olan dükkân-ı mezkûrda müstecir ve ihrâkda muhterik olduğunu ikrâr ü i‘tirâf ve mâ‘adâyı ba‘de’l-inkâr mesfûr Kiryako dükkân-ı mezkûr muhterik olduğu esnâda müvekkil-i mûmâ-ileyhimden dükkân-ı merkūm inşâsı için ancak iki yüz guruş ahz ve mâ‘adâ her ne mikdâr dükkân-ı mezkûra ziyâde masrûfu olup teberru‘an li’l-vakf binâ ve ihdâs etdikde ziyâde sarf eylediği meblağdan müvekkilim mûmâ-ileyh Allâme Efendi ile hemşîresi Âişe Hanım’ın ve sagīre-i mezbûre Hadice Hanım’ın husûs-ı merkūma müte‘allika da‘vâdan zimmetlerini ibrâ-yı âmm-ı râfi‘ü’l-hisâm ile ibrâ ve iskāt-ı hak etmeğin, müvekkilim mûmâ-ileyh dahi kendi nefsinden asâleten ve hemşîresi mûmâ-ileyhâ tarafından vekâleten ve sagīre-i mezbûre tarafından vesâyeten ibrâyı ba‘de’l-kabûl, dükkân-ı mezkûru bi’t-terâzî beher şehr onar buçuk guruşa mersûm Kiryako zimmîye îcâr ve teslîm, ol dahi istîcâr ve kabûl eyledi deyü def‘le mukābele ve def‘-i meşrûhunu mütebeyyin bir kıt‘a temessük ibrâz eyledikde ibrâ-yı mezkûru ve ol-vechile îcâr ve istîcârı ve temessükü bi’l-külliye ba‘de’l-inkâr, minvâl-i meşrûh üzere def‘ini el-Hâc Selim Ağa b. Abdullah ve es-Seyyid Mustafa b. Mehmed şehâdetleriyle müdde‘î-i mesfûr Kiryako muvâcehesinde vech-i şer‘î üzere isbât edip şehâdetleri makbûle olmağın mûcebiyle müdde‘î-i mersûm Kiryako zimmî husûs-ı mezkûra ve dükkân-ı merkūm icâresinde müvekkilim mûmâ-ileyh el-Hâc Mustafa Allâme Efendi’yi bî-vech-i şer‘î mu‘ârazadan ba‘de’l-men‘ mersûm Kiryako zimmî zimmetinde icâre-i mezkûreden terâküm eden meblağ-ı merkūm kırk iki guruşu müvekkil-i mûmâ-ileyh el-Hâc Mustafa Allâme Efendi’ye edâ ve teslîme mersûm Kiryako zimmîye tenbîh olunduğu İstanbul Mahkemesi’nden huzûr-ı [âlîlerine i‘lâm olundu.] Fî 29 Za sene 1222.