İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 202 Hüküm no: 166 Orijinal metin no: [21a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çeşme kasabasında İbrahim Ağa Camii ile Mustafa Memiş Ağa’ların camileri vakfından çarşı içindeki kasap dükkânlarının deniz kenarına taşınması Çeşme kasabasında kasab nizâ‘ı Ma‘rûz “Arzuhâl bâlâsında derkenâr ve i‘lâm[a] nazar, husûs-ı merkūmun keyfiyet-i muktezâsını i‘lâm eyleyesiz” deyü bu dâ‘îlerine [hitâben] sâdır olan emr-i âlîlerine imtisâlen nazar olundukda cezîre-i Sakız kazâsına muzâfe Çeşme nâm kasabada bundan akdem ashâb-ı hayrâtdan merhûm İbrahim Ağa binâ ve ihyâ eylediği câmi‘-i şerîf ve Mustafa ve Memiş’in bundan akdemce binâ ve inşâ eyledikleri câmi‘-i şerîf câmi‘ateyn-i mezkûreteyn musakkafâtından dört bâb kasab dükkânları kasaba-i mezbûre çarşısı derûnunda olmağla dekâkin-i merkūmede zebh olunan hayvanâtın ta‘affünü sebebiyle râyiha-i kerîhesinden ahâli-i kasaba-i mezbûre müte’ezzî olduklarından başka tâife-i nisvânın lahm iştirâ için de usret çekeceklerinden mâ‘adâ dekâkin-i mezkûre müşrif-i [harâb] ve mâil-i türâb olmağla mezbûr İbrahim Ağa Vakfı’nda dahi ta‘mîr ve termîmine vefâ edecek nemâsı habbe-i vâhide olmamağın mezbûrân Mustafa ve Memiş kendi mâllarından bir kimesnenin mülkü olmayan leb-i deryâda müceddeden dört bâb kasab dükkânları binâ ve inşâ edip kasaba-i merkūmede çarşı derûnunda harâb dekâkin-i mezbûreyi müceddeden binâ eyledikleri dört bâb kasab dekâkinine bi-tarîki’l-istibdâl tebdîl ve nakl ve dekâkin-i mezkûrenin iki bâbını merkūm İbrahim Ağa câmi‘ine ve iki bâbını kendileri binâ ve ihyâ eyledikleri câmi‘e îrâd-ı vakıf kayd ve ta‘yîn eylediklerinde husûs-ı merkūmeye ecânibden bir kimesne müdâhale etmek iktizâ etmez iken âhar ba‘zı kimesne a‘zâr-ı vâhiye îrâd ile vakfeyn-i merkūmeyne hilâf-ı şer‘-i şerîf ve mugāyir-i münîf ta‘dîlleriyle vakfeyn-i merkūmeynin îrâdına kesr ve noksân terettüb edeceği kasaba-i merkūme ahâlisine, derûn-ı kasabada olan dekâkinde zebh olunan hayvanâtın ta‘affünü sebebiyle râyıha-i kerîhesinden müte’ezzî ve emrâz-ı muhtelife hudûsu derkâr ve vakfeyn-i merkūmeyne zararı olacağı kuyûdât ve i‘lâmdan müstebân olmağla husûs-ı merkūma ba‘zı kesânın mümâna‘atı def‘ ve men‘ buyurulmak bâbında istihkâmen emr-i âlîleri sudûru iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-gurreti M sene 1223.