İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 202 Hüküm no: 167 Orijinal metin no: [21a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a getirilen yağlar hakkında kapan nizamnamesine uygun hareket olunması Revgan mâddesi Ma‘rûz “Bu makūle zehâirin celbi muktezâ-yı vakt ü hâle nazaran lâzımeden olmağla istid‘âya nazar ve nizâma dahi halel târî olmayacak dereceleri mütâla‘a birle i‘lâm eyleyesiz” deyü bu dâ‘îlerine hitâben şeref-bahş-ı sudûr eden fermân-ı cihân-mutâ‘larına imtisâlen istid‘âya ba‘de’n-nazar taşradan Âsitâne-i aliyye’ye zehâir celbinde izin ve ruhsat verilmek lâzıme-i halden olup lâkin revgan-ı mezkûr Âsitâne-i sa‘âdete vürûdunda kapanlar nizâmına tatbîkan bi’l-cümle tüccârın dahi celb eyledikleri revganlarına şurût ve nizâmları üzere ne vechile mu‘âmele olunur ise sâhib-i arzuhâl kullarına dahi ol-vechile mu‘âmele olunup hilâfına dâir gerek kapan tüccârı ve gerek sâir kimesneler tarafından müdâhale olunmayıp ol-vechile revgan-ı mezkûr Âsitâne-i aliyyeye celb olunması için bâlâ-yı i‘lâma fermân-ı âlîleri sudûru iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî-gurreti M sene 1223.