İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 203 Hüküm no: 168 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı esnafından Hacı Ömer Ağa’nın Galata’da Yağkapanı’ndaki mahzen gediği hissesini Kırımlı Molla Ebubekir’e satması Galata Yağkapanı’nda kârgîr mahzen gediği Ma‘rûz Mahrûse-i Galata’da Yağcı esnafından el-Hâc Ömer Ağa b. Süleyman meclis-i şer‘-i münîrde şerîki es-Seyyid Hafız Ahmed Efendi hâzır olduğu hâlde işbu hâmilü’s-sifr esnâf-ı mezkûreden Kırımî Molla Ebûbekir b. Hasan muvâcehesinde ikrâr-ı tam ve takrîr-i kelâm edip mahrûse-i mezbûrede Galata Yağkapanı’nda kâin bir tarafdan es-Seyyid Mehmed Kadri mahzeni ve bir tarafdan nerdubân ve bir tarafdan tarîk-i âm ile mahdûd bir bâb kârgîr mahzen derûnunda vâki‘ âlât-ı lâzıme-i ma‘lûme yüz yirmi sehm i‘tibârıyla altmış sehmi hâzır-ı mezbûrun ve altmış sehmi akd-i âti’z-zikrin sudûruna değin bu sûretle benim yedimde mülk ve hakkım olup ben âlât-ı lâzıme-i ma‘lûmenin ber-vech-i âtî bey‘ murâd eylediğimde tüccâr malını muhâfaza için Âsitâne-i aliyyede ve Bilâd-ı selâse’de ve tevâbi‘inde bi’l-cümle gediklerinin bey‘ ü şirâ ve hibe ve îcâr ve istîcâr ve istihbâr hüccetleri İstanbul Mahkemesi’nden gayrı mehâkimde tahrîr ve takrîr olunmak bâ-emr-i âlî memnû‘ olduğu şurût-ı müstahsene-i mer‘iyeden olduğuna binâen mahrûse-i mezbûrede Yağkapanı Nâzırı es-Seyyid el-Hâc Ali Ağa ve Kırımî Osman Ağa ve mahzenî Abdurrahman Ağa ve Ketânî Hasan Ağa ve sâirleri ma‘rifetleriyle zikri mesbûk altmış sehm hisse-i şâyı‘amı tarafeynden îcâb ve kabûlü hâvî şurût-ı müfsideden ârî bey‘-i kat‘î ve safka-i vâhide ile bin beş yüz guruşa merkūm Molla Ebûbekir’e bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr bin beş yüz guruşu müşteri-yi mezbûr bana def‘ ü teslîm ben dahi yedinden tamamen ahz ü kabz eyledim. Fîmâ-ba‘d sâlifü’z-zikr gedik ta‘bîr olunur bir kantar, bir terâzî ma‘a derâhim ve bir akçe tahtası ve bir pîş-tahta ve bir minder âlât-ı lâzıme-i ma‘lûmenin i‘tibâr-ı merkūm üzere altmış sehm hisse-i şâyi‘ası merkūm Molla Bekir’in mülk-i müşterâsı ve hakk-ı sırfı olup ancak altmış sehm hisse-i şâyi‘asında benim aslâ ve kat‘a alâka ve medhalim kalmamağla mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ ve iskāt ve her birimiz ber-vech-i muharrer âharın ibrâsını ba‘de’l-kabûl gedik-i mezbûrun nısfı hâzır-ı mezbûr es-Seyyid Hafız Ahmed Efendi üzerinde ibkā ve nısf-ı âharı müşteri-yi mezkûr Molla Ebûbekir’in ismine tasrîh ile kalemine kayd ve yedine sûret i‘tâsını bi’l-cümle istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî 5 min-Zilhicceti’ş-şerîfe sene 1222.