İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 208 Hüküm no: 173 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arpacı esnafının bakkal esnafı aleyhindeki yamaklık ve yardım taleplerinin kanunsuz olduğu Arpacılar ile bakkālânın münâza‘ası Ma‘rûz Ashâb-ı arzuhâl Âsitâne-i aliyye’de vâki‘ arpacı esnâfının kethudâları Süleyman Ağa ve Yiğitbaşıları Mehmed Usta ve es-Seyyid Himmet Usta ve Yazıcı Ali Usta ve Süleyman Usta ve sâbık yiğitbaşı Hasan Usta ve Hasan Alemdar ve Uzun Hasan ve Mehmed Usta ve Seyyid Mustafa Usta ve diğer Süleyman Usta ve İbrahim Usta ve Mehmed Usta ve Mahmud Ağa ve Yusuf Usta ve Musa Usta meclis-i şer‘-i münîrde derûn-ı arzuhâlde isimleri mezkûr bakkālân pazarbaşısı Süleyman Ağa ve Bölükbaşı es-Seyyid Ahmed ve es-Seyyid Osman usta nâm kimesneler ile re‘âyâ nizâm ustalarından kābız-ı mâl Yorgi ve Çakıroğlu Yorgi ve Dimitri ve Terfinos ve diğer Yorgi ve sâir bi’l-cümle bakkālân esnâfı muvâcehelerinde esnâf-ı merkūmûn dükkânlarında ve ba‘zan salaşlarında ve müstecir oldukları han derûnlarında bârgir için [22b] ibâdullâha şa‘îr bey‘ ve ol-vechile intifâ‘ etmeleriyle işbu yedimizde olan atik hüccete binâen esnâfımıza yamak ve mülhak olup bu sene-i mübârekede ordu-yı hümâyûn-ı nusret-makrûnda mevcûd arpacı haymeleri ustaları masrûfâtı için bakkāl esnâfı merkūmûn kā‘ide-i kadîme üzere yamaklık nâmıyla esnâfımıza imdâd ve i‘ânetleri matlûbumuzdur dediklerinde gıbbe’l-istintâk bakkāl esnâfı merkūmûn cevâblarında arpacı esnâfı müdde‘iyûn-ı merkūmûn bundan akdem Mısr-ı Kāhire ordu-yı hümâyûnu hengâmında bin iki yüz on dört senesi Şa‘bân-ı mu‘azzamı’nın yedinci günü İstanbul kādısı olup bâ-pâye-i sadr-ı Anadolu fazîletlü semâhatlü es-Seyyid Mehmed Nureddin Efendi huzûrunda bizden husûs-ı mezkûru mutâlebe, biz dahi mâ-tekaddümden beri bakkāl tâifesi müstakıl esnâf olup her dürlü metâ‘ bey‘ edegelip ve arpacı esnâfına mülhak ve yamak olmayıp bu ana gelince yamaklık nâmıyla i‘ânetlerimiz dahi mesbûk olmadığından mâ‘adâ işbu yedimizde olan teşrîfâtdan muhrec derkenâr nâtık olduğu üzere bakkāl esnâfının arpacı esnâfına mülhak ve yamak kaydı olmayıp esfâr-ı sâbıkālarda dahi imdâd ve i‘ânetlerimizin kaydı bulunmayıp lâkin arpacı esnâfı müdde‘ûn-ı merkūmûn mücerred sizler bakkāl esnâfı olup şa‘îr bey‘ etmenizle bize mülhak ve yamak olmuş olursunuz. Elbetde esnâfımıza yamak verin deyü bilâ-fermân-ı âlî eyledikleri iddi‘âları iltifâta şâyân <> yedlerinde olan hüccet-i mezkûre tenfîz olmamağla arpacı esnâfı müdde‘ûn-ı merkūmûn husûs-ı mezkûr için bî-vech mu‘ârazadan men‘ olunmuş idi deyü min-külli’l-vücûh takrîrlerine mutâbık ve kādı-yı mûmâ-ileyhin hâtemini hâvî bir kıt‘a i‘lâm ve derkenârın mazmûnunu arpacı esnâfı müdde‘iyûn-ı mezbûrûn ikrâr ve tasdîk etmeleriyle ol-vechile müdde‘iyûn-ı mezbûrûn husûs-ı merkūm için bakkāl esnâfı mezbûrûna tekrar bî-vech mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 3 min-Muharrem sene 1123.