İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 209 Hüküm no: 174 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü Seyyid Mehmed Beşe’ye olan borcunu ödemesi hususunda İsmail Ağa’ya tenbihte bulunulması 1500 guruş hüküm. Ma‘rûz Sâhib-i arzuhâl Kömürcü es-Seyyid Mehmed Beşe b. Ahmed nâm kimesne meclis-i şer‘-i münîrde Hâssa Hasekilerinden derûn-ı arzuhâlde mezkûrü’l-ism İsmail Ağa b. Halil nâm kimesne muvâcehesinde benim mezbûr İsmail Ağa zimmetinde bundan akdem yedimden ve malımdan iştirâ ve kabz eylediği vezn ve fiyâtı beynimizde ma‘lûm kömür semeninden iki bin guruşdan bâkī bin beş yüz guruş alacak hakkım olmağla meblağ-ı bâkī-i merkūmu mezbûr İsmail Ağa’dan hâlâ taleb ederim deyü da‘vâ, ol dahi ber-vech-i muharrer ikrâr ü i‘tirâf etmeğin alâ-mûcebi i‘tirâfihî meblağ-ı bâkī-i merkūm bin beş yüz guruşun müdde‘î-i mezbûr es-Seyyid Mehmed Beşe’ye edâ ve teslîmiyle merkūm İsmail Ağa ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî 28 min-Zilhicce sene 1222.