İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 210 Hüküm no: 175 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar nalbant esnafının ordu-yı hümayuna verecekleri paraya arabacı esnafının yamaklık adıyla yardımda bulunmaları Na‘lbandân ile arabacıların ta‘ahhüdleri Ma‘rûz Ashâb-ı arzuhâl medîne-i Üsküdar’da vâki‘ na‘lbandân esnâfının kethudâsı Mehmed Ağa ve ihtiyârlarından Ahmed Usta ve Mehmed Usta ve Ömer Usta ve es-Seyyid Mustafa Usta ve diğer Ahmed Usta ve sâirleri meclis-i şer‘-i münîrde arzuhâlde mezkûr medîne-i mezbûre arabacıları kethudâsı ve yiğitbaşı ve ihtiyârları mazbûtü’l-esâmî kimesneler muvâcehelerinde işbu yedimizde olup bin iki yüz on dört senesi Şa‘bânının on birinci günü târihiyle müverrah ve ol târihde İstanbul kādısı olup hâlâ bâ-pâye-i Sadr-ı Anadolu fazîletlü semâhatlü es-Seyyid Mehmed Nureddin Efendi hazretlerinin hâtemini hâvî bir kıt‘a i‘lâm ve teşrîfâtdan muhrec derkenâr mantûklarınca Âsitâne-i aliyye na‘lbandânına arabacıları ilhâk ve yamak olmalarıyla imdâdiyelerini eğerçi edâ eylemeyip ve Üsküdar na‘lbandları dahi bi-emr-i âlî Âsitâne-i aliyye na‘lbandlarına imdâd ve i‘ânet eylediklerinden Üsküdar arabacıları dahi Âsitâne misillü medîne-i mezbûre na‘lbandânına bir mikdâr mebâliğ imdâd ve i‘âne etmelerini mutâlebe eylediğimizde onlar dahi rızâlarıyla medîne-i mezbûre na‘lbandânına yetmiş beş guruş verip ol-vechile yamak ve mülhak olmuşlar idi. Lâkin arabacı esnâfı merkūmûn sene-i sâbıkā ve işbu sene-i mübârekede yamaklık nâmıyla kat‘a nesne vermediklerinden mâ‘adâ el-hâletü hâzihî Ordu-yı hümâyûn mesârifi esfâr-ı sâbıkādan ezyed olmağla bir mikdâr mebâliğ dahi zamla seneteyn-i mezkûreteynin yamaklıklarını edâ eylesinler deyü mütâlebeye tasaddî eylediklerinde medîne-i mezbûre arabacıları kethudâsı dahi seksen guruşdan iki senelik yüz altmış guruş rızâlarıyla medîne-i mezbûre na‘lbandânı esnâfı müdde‘iyûn-ı merkūmûna edâ ve teslîme müte‘ahhid olup bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 25 min-Zilhicceti’ş-şerîfe sene 1222.