İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 210 Hüküm no: 176 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanaş v. Aleksan’ın Ağya v. Markar aleyhindeki alacak davasının reddedilmesi 1500 guruş men‘ Ma‘rûz Arzuhâl eden uncu tâifesinden Tanaş v. Aleksan nâm zimmî meclis-i şer‘-i hatîrde sâbıkā şerîki derûn-ı arzuhâlde mersûmü’l-ism Ağya v. Markar nâm zimmî muvâcehesinde ben bundan akdem mersûm Ağya zimmî ile fâide, hâsıla beynimizde beraber olmak üzere unculuk ticâretinden bir müddet şerîkler olup ba‘dehû fesh-i akd-i şirket birle hesâbımızı sahîhan rü’yet eylediğimizde re’s-i mâl ve fâideden her birimiz hisse-i ma‘lûmemizi âhar yedinden ahz ü kabz edip ancak ben mersûm Ağya zimmîye şirketimiz esnâsında malımdan bin beş yüz guruş ikrâz ve teslîm, ol dahi iktirâz ve kabz eyledikden sonra meblağ-ı merkūmu mersûm Ağya zimmîden kabza gāib ani’l-meclis Kömürcü Veliyüddin Ağa nâm kimesneyi tarafımdan tevkîl etmiş idim. Lâkin mersûm Ağya zimmî meblağ-ı merkūmu vekîlim gāib-i mezbûra ver[mey]ip hâlâ zimmetinde kalmağla meblağ-ı merkūm bin beş yüz guruşu merkūm Ağya zimmîden taleb ederim deyü ba‘de’d-da‘vâ ve’l-inkâr müdde‘î-i mesfûr ber-vech-i muharrer müdde‘âsına ikāmet-i beyyine edemeyip bi’t-taleb mersûm Ağya zimmî bi’l-muvâcehe vech-i şer‘î üzere tahlîf olunmağın mûcebince müdde‘î-i mersûm Tanaş zimmî da‘vâ-yı mezkûresiyle mesfûr Ağya zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 26 min-Zilhicceti’ş-şerîfe sene 1222.