İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 215 Hüküm no: 183 Orijinal metin no: [23a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halka eksik tartı ile sabun satan Ali ile pahalı fiyatla leblebi satan Mehmed’in kalebendliğe mahkum olup Yedikule kalesine konulmaları Sabuncu kal‘abendi Ma‘rûz Sabuncu küfecilerinden olup ibâdullâha bey‘ eylediği sabun veznesi on iki ve hilâf-ı emr-i âlî isti‘mâl eylediği yarım vakıyyenin dökme kurşun dirhemi dahi otuz sekiz dirhem noksân ki bu vechile yarım vakıyye vererek ibâdullâha elli dirhem noksânına sabun bey‘ eden Sîmkeşhâne kurbünde Ali ve yine leblebici tâifesinden olup narh-ı cârîden efhaş-ı fâhiş-i ziyâde ile ibâdullâha leblebi bey‘ ve ol-vechile ibâdullâha ızrâr eder iken ahz olunup el-yevm Ağakapısı’nda mahbûs olan mezbûr Ali ile Okçular başında leblebici Mehmed sâire ibreten ıslâh-ı nefs oluncaya değin Yedikule kal‘asında kal‘abend olunmak bâbında fermân-ı âlîleri sudûru iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 8 min-Muharrem sene 1223.