İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 215 Hüküm no: 184 Orijinal metin no: [23a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tanaş v. Panayot’un Tarabya’da ekmekçi değirmenine kanunsuz olarak ilave ve has un ürettiği değirmen taşının kaldırılması Yeniköy’de uncu değirmeni Ma‘rûz Hâmiş-i arzuhâlde mastûr ve derkenâr nâtık olduğu üzere beher yevm otuz keyl dakīk ta‘yînatı olan mahrûse-i Galata’ya muzâfe İstinye nâhiyesine tâbi‘ Yeniköy’de iskele başında kâin dört horoslu bir bâb uncu değirmeninin gediğine mâlik olup [23b] arzuhâl eden Artin v. Bogos ve şerîki Bağdisar v. Yani nâm zimmîler meclis-i şer‘-i enverde yine nâhiye-i mezbûra tâbi‘ Tarabya’da vâki‘ iki horoslu bir bâb ekmekçi fırını değirmeninin gediğine mâlik olan Tanaş v. Panayot nâm zimmî muvâcehesinde Uncular Kethudâsı es-Seyyid Mustafa Ağa ve Nizâm ustalarından Hasekili Haçok ve Mandik ve Badirgan? ve Agob ve Badican ve Ziron ve Dakis ve sâirleri hâzır oldukları hâlde sâlifü’l-beyân Tarabya’da mâ-tekaddümden beri değirmen olmayıp lâkin mersûm Tanaş zimmî bundan akdemce habbâzân tâifesinin şurût-ı nizâmlarına tatbîkan bâ-i‘lâm ve bâ-fermân-ı âlî iki horoslu bir bâb ekmekçi değirmeni mahrûse-i Galata cânibinden nakl ve ihdâs ve nân-ı azîz tabh ve ibâdullâha bey‘le ta‘ayyüş edegelmiş iken bu esnâda adem-i kanâ‘at birle hilâf-ı şurût-ı nizâm ve mugāyir-i de’b-i intizâm değirmen-i mezkûre bir aded taş vaz‘ ve müceddeden bir horos ihdâs ve dakīk-i hâs i‘mâl edip lâkin muhdes olan taşın kaleminde kaydı olmayıp ve bizim ber-mûceb-i sûret gediğine mâlik olduğumuz değirmen-i mezkûrun ta‘yînâtı olan derkenârda mezkûr çörekçi ve simitçi fırınlarına bey‘ edip ol-vechile uncuyân ve habbâzân tâifelerinin şurût-ı nizâmlarına halel-târî olacağından mâ‘adâ giderek sâire sirâyet ile habbâzân ve uncuyân zimmetlerinde olan emvâl-i mîrîye ve tüccârın tahsîlinde akde tehîre sebeb-i müstakıl olacağı rû-nümâ olduğuna mebnî mersûm Tanaş zimmînin dakīk-i hâs i‘mâli için ihdâs eylediği bir aded taşın ref‘i ve sûret-i mezkûrun tecdîd olunması murâdımızdır dediklerinde mersûm Tanaş zimmî dahi kaziyye minvâl-i meşrûh üzere olduğunu ikrâr ü i‘tirâf etmeğin husûs-ı mezkûr kethudâ ve nizâm ustaları hâzırûn-ı merkūmûndan dahi istintâk olundukda hâl mukırrân-ı müdde‘iyân-ı mersûmânın takrîr-i meşrûhları üzere olduğunu ve sûret-i mezkûrun tecdîdinde bir gûne mahzûr olmadığını her biri meclis-i şer‘a ihbâr ve zimmî-yi mersûmun hilâf-ı emr-i âlî ve mugāyir-i şurût-ı nizâm ihdâs eylediği mârrü’z-zikr bir aded taşın ref‘i ve sûret-i mezkûrenin tahdîdi ve nizâm-ı kadîm-i mezkûrelerinin muhâfazası zımnında bâlâsı tuğrâ-yı garrâ-yı cihân-dârî ile müzeyyen bir kıt‘a emr-i âlî i‘tâsını bi-ecma‘ihim istid‘â ve istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî 15 Z sene 1222