İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 216 Hüküm no: 185 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manol v. Mitro’nun tütüncü dükkânı gediğini Gümülcineli Praşkova ve ortağı İskeçeli Karyako’ya satması Galata’da tütüncü gediği Ma‘rûz Mahrûse-i Galata’da Karaki kapısı dâhilinde Haffâflar köşesi nâm mahâlde kâin Ma‘den Kalemi’nde mukayyed ve mu‘teber bir bâb tütüncü dükkânı derûnunda mevcûde beyne’l-hıref gedik ta‘bîr olunur âlât-ı lâzımeye tedâvül-i eyâdî ile mâlik olan Boğça Adalı Manol v. Mitro nâm zimmî meclis-i şer‘-i münîrde tütün tüccârından Gümülcineli Praşkova v. Duka ve şerîki İskeçeli Kiryako v. Yorgi nâm zimmîler muvâcehelerinde kethudâ İbrahim Ağa ve esnâfından Şehremînli Mustafa Efendi ve es-Seyyid el-Hâc Mehmed Emin Efendi ve Kurbancızâde Ali Efendi ve es-Seyyid el-Hâc Mustafa Ağa ve İmâmzâde Ahmed Ağa ve Alemdar Musa Ağa ve sâir mazbûtü’l-esâmî kimesneler hâzır oldukları hâlde kalem-i mezkûrda Galata’da Sandıkçılar başında mahâll-i mezbûrda Manas Yahûdî üzerinde deyü mukayyed bâ-hüccet ve bâ-temessük mâlik olduğum gedik ta‘bîr olunur âlât-ı lâzıme-i ma‘lûme-i mezkûremi tarafeynden bi’l-îcâb ve’l-kabûl bâtten ve sahîhan üç bin elli guruş semen-i medfû‘ ve makbûza mersûmân Praşkova ve Kiryako zimmîlere ale’l-iştirâki’s-seviyy esnâf-ı hâzırûn-ı merkūmûn ma‘rifetleriyle bey‘ ü temlik ve teslîm, onlar dahi iştirâ ve temellük ve tesellüm ü kabûl edip mebî‘-i mezkûrun tağrîr ve gabnine müte‘allika âmme-i de‘âvîden herbirimiz âharın zimmetini kabûlü hâvî ibrâ ve iskāt eyledik. Fîmâ-ba‘d gedik-i mezkûrda benim kat‘a alâka ve medhalim kalmayıp mersûmân Praşkova ve Kiryako zimmîlerin ale’l-iştirâki’s-seviyy mülk-i müşterâları ve hakk-ı sırfları olmuşdur deyü ba‘de’l-ikrâr ve’t-tasdîk gedik-i mezkûr kaydı mahâllinde mesfûr Manas Yahûdî isminden ref‘ ve terkīn ve müşteriyân-ı mersûmân Praşkova ve Kiryako zimmîler ismi tasrîhiyle kayd olunup zabt ve tasarruflarını nâtık yedlerine sûret i‘tâ olunması bâbında istid‘â-yı inâyet eyledikleri İstanbul Mahkemesi’nden huzûr-ı âlîlerine i‘lâm olundu. Fî 19 min-Zilhicceti’ş-şerîfe sene 1222.