İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 217 Hüküm no: 186 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmamoğlu Seyyid Hacı Ali’nin Kırıkoğlu Seyyid Ali Ağa aleyhindeki eşya talebi Eşyâ semeni da‘vâsı mazbatadan, Ma‘rûz Vilâyet-i Anadolu’da Niğde sancağında Bereketlü Ma‘den-i hümâyûnuna merbût Çamardı kazâsına tâbi‘ Uluağaç karyesi ahâlisinden sâhib-i arzuhâl İmâmoğlu es-Seyyid el-Hâc Ali Ağa b. es-Seyyid Mustafa meclis-i şer‘-i münîrde livâ-i mezbûr ahâlisinden derûn-ı arzuhâlde mezkûrü’l-ism Kırıkoğlu es-Seyyid Ali Ağa b. es-Seyyid Mehmed nâm kimesne muvâcehesinde mezbûr es-Seyyid Ali Ağa târih-i i‘lâmdan iki sene mukaddem ammisi ma‘den-i mezbûr emîni olup bundan akdem fevt olan Kırıkoğlu İbrahim Ağa’nın yanında ve hizmetinde olmak takrîbiyle beni cürümle ithâm ve karye-i mezbûreye gelip menzilime duhûl ve malımdan mecmû‘u dokuz yüz on guruş kıymetli bir çift tonbay ve bir araba ve bir çuka biniş ve beş Tunus fesi ve bir börk fesi ve dokuz tambak zarf ve dört kat oda döşemesi ve sekiz kilim ve beş seccâde ve üç döşek ve dört yorgan ve iki yasdık ve bir kebîr sini ve bir leğen ma‘a ibrik ve bir pekmez leğeni ve sekiz sahan ve beş lenger ve üç tencere ve iki tâbe ve iki güğümü bi-gayrı hakkın ahz ü kabz ve istihlâk etmekle kıymet-i mezkûrları olan meblağ-ı merkūm dokuz yüz on guruşu mezbûr es-Seyyid Ali Ağa’dan bi-tarîki’d-damân taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını isbât için beyâna havâle olunup lâkin tarafeyn bir dahi meclis-i şer‘a gelmemeleriyle henüz da‘vâlarına faysal verilmediği dört gün mukaddem vakāyi‘ kâtibimiz cerîdesinde mazbûr ve mukayyed olup imtisâlen li’l-emri’l-âlî sûret-i zabtı İstanbul Mahkemesi’nden huzûr-ı âlîlerine i‘lâm olundu. Fî 9 min-Muharremi’l-harâm sene 1223.