İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 218 Hüküm no: 187 Orijinal metin no: [23b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa ve kardeşi Ali Ağa’nın Üsküdar’da tasarruflarındaki dükkânda kiracı olan Berber Seyyid Mehmed Ağa’nın dükkânı boşaltması Üsküdar’da tabîb dükkânı Ma‘rûz Sâhib-i arzuhâl Ahmed Ağa nâm kimesne meclis-i şer‘-i münîrde karındaşı olup zikri âtî dükkânın mecmû‘una mutasarrıf ve ol-vechile vaz‘-ı yedi mütehakkık olan derûn-ı arzuhâlde mezkûrü’l-ism Ali Ağa muvâcehesinde hâmiş-i arzuhâlde mastûr defter-i vakıfdan muhrec derkenâr nâtık olduğu üzere vüzerâ-yı i‘zâmdan müteveffâ el-Hâc Ahmed Paşa Vakfı musakkafâtından medîne-i Üsküdar’da Kara Davud Paşa mahallesinde vâki‘ yevmî bir akçe icâre-i müecceleli ma‘lûmü’l-hudûd bir bâb kârgîr tabîb dükkânı bilâ-gedik an-aslin berber dükkânı olup Mustafa b. İbrahim’in taht-ı tasarrufunda iken mezbûr Mustafa bin iki yüz sekiz senesi Cumâdelâhirinin yedinci günü babamız Kuşçu Ali b. Mehmed’e bâ-ma‘rifet-i mütevellî ferâğ ve tefvîz, ol dahi tefevvüz ve kabûl ve dükkân-ı mezkûru berber dükkânlığından tabîb dükkânlığına tebdîl edip müddet-i vâfire tabîb dükkânı iken babamız merkūm Kuşçu Ali fevt ve dükkân-ı mezkûr benimle karındaşım mezbûr Ali’ye bi’l-münâsafe âdiyen [24a] intikāl etdikden sonra ben iki yüz yirmi senesi Cumâdelûlâ’nın yirmi yedinci günü karındaşım mezbûrdan istidâne ve kabz eylediğim beş yüz guruş zimmetimde deynim mukābelesinde dükkân-ı mezkûrda mutasarrıf olduğum nısf hisse-i şâyi‘amı her ne zaman edâ-yı deyn eder isem redd-i ferâğ etmek şartıyla bâ-ma‘rifet-i mütevellî sûret-i kat‘iyyede vefâen fâriğ olduğumdan sonra karındaşım mezbûr Ali Ağa dükkân-ı mezkûrda müşâhereten müstecir olan tabîbi ihrâc ve arzuhâlde ismi mezkûr berber esnâfından Seyyid Mehmed b. İbrahim îcâr ve teslîm etmiş idi. hâlâ deynim olan meblağ-ı merkūmu yedimden ahz birle nısf dükkân-ı mezkûru red ve ferâğa karındaşım mezbûr Ali Ağa’ya tenbîh olunmak matlûbumdur deyü mütevellî vekîli hâzır olduğu hâlde tasdîkiyle ba‘de’d-da‘vâ ve’l-istintâk mezbûr Ali Ağa cevâbında kaziyye minvâl-i meşrûh üzere olduğunu bi-tamamihi tâyi‘an ve kat‘iyyen ikrâr ü i‘tirâf etmeğin mûcebince meblağ-ı merkūm beş yüz guruşu ahz birle nısf dükkân-ı mezkûru müdde‘î-i mezbûr Ahmed Ağa’ya red ve teslîme mezbûr Ali Ağa’ya tenbîh olunup mütevellî vekîli dahi vech-i meşrûh üzere tasarrufunu re’y etdikden sonra mezbûrân Ahmed Ağa ve Ali Ağa meclis-i şer‘de müstecirleri olup merkūm es-Seyyid Mehmed Ağa mahzarında mezbûr es-Seyyid Mehmed Ağa dükkân-ı mezkûrda müşâhereten müstecirlerimiz olmağla târih-i i‘lâm-ı şehrî gāyetinde fesh-i akd-i icâre et[me]mizle dükkân-ı mezkûru gāyet-i şehr-i merkūmda tahliye ve bize teslîme mezbûr es-Seyyid Mehmed Ağa’ya tenbîh olunmak murâdımızdır dediklerinde mezbûr es-Seyyid Mehmed Ağa cevâbında dükkân-ı mezkûr mutasarrıfları müdde‘iyân-ı mezbûrândan merkūm Ali Ağa bundan akdem dükkân-ı mezkûrun havâyî gediğini Medîne-i Üsküdar Mahkemesi’nde bâ-hüccet bana semen-i ma‘lûme bey‘, ben dahi gāib ani’l-meclis Berber Süleyman’dan aldığım Başmuhâsebe’de mukayyed ve mu‘teber berber gediğimi dükkân-ı mezkûra nakletmiş idim deyü dükkân-ı mezkûru tahliye ve teslîme ibâ vü imtinâ‘ edip evvelâ hâmiş-i arzuhâlde olan Başmuhâsebe kaydına nazar olundukda dükkân-ı mezkûrun gedik kaydı bulunmadığı müstebân ve bu makūle nakl-i gedik vukū‘unda dahi dükkân mutasarrıflarının izniyle bâ-i‘lâm ve bâ-fermân Başmuhâsebe Kalemine kayd olunması muhtâc olan mevâddan olmağla ol-vechile mezbûr es-Seyyid Mehmed Ağa’nın ben gedik ettim deyü beyhûde kelâmına şer‘an ve kānûnen iltifât olunmayıp mûcebince dükkân-ı mezkûru gāyet-i şehr-i merkūmda tahliye ve mutasarrıfları müdde‘iyân-ı mezbûrâna teslîme merkūm es-Seyyid Mehmed Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî selhi Zilhicceti’ş-şerîfe sene 1222.