İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 219 Hüküm no: 188 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenci Fatıma’nın boşandığı eşi Hüseyin Beşe aleyhindeki alacak davasında haksız olduğu Drağman’da menzil ve berber dükkânı, Ma‘rûz Sâhibe-i arzuhâl zâtı mu‘arrefe Zenciye Fatıma bt. Abdullah nâm hatun meclis-i şer‘-i münîrde zevc-i mutallıkı derûn-ı arzuhâlde mezkûrü’l-ism Hüseyin Beşe b. Osman nâm kimesne muvâcehesinde İstanbul’da Tercümanyunus mahallesinde vâki‘ ma‘lûmü’l-hudûd ve’l-müştemilât bir bâb vakıf menzil ve tahtında bir bâb berber dükkânı bâ-temessük-i mütevellî benimle mezbûr Hüseyin Beşe’nin bi’l-icâreteyn münâsafeten taht-ı tasarrufumuzda iken mezbûr Hüseyin Beşe zevc-i dâhilim olmak takrîbiyle beni iğfâl ve zikr olunan menzil ve dükkânı sûk-ı sultânîde müzâyede ve ragabât-ı nâs inkıtâ‘ından sonra bin yüz guruşda gāib ani’l-meclis Tersâne-i âmire çavuşlarından Salih Ağa üzerinde karâr ve ziyâde ile tâlib-i âharı zuhûr etmediğine binâen ben ve mezbûr Hüseyin Beşe sâlifü’z-zikr menzil ve tahtında olan berber dükkânını gāib-i mezbûr Salih Ağa’ya meblağ-ı merkūm bin yüz guruş bedel mukābelesinde bâ-ma‘rifet-i mütevellî ferâğ ve tefvîz ve bedel-i merkūmu yedinden ahz ü kabz ve bi’l-münâsafe beynimizde iktısâm etmiş idik. Lâkin mârrü’l-beyân menzil ve dükkânın değeri iki bin beş yüz guruş olmağla ol-vechile ziyâdesi olan bin dört yüz guruşdan nısfına isâbet eden yedi yüz guruşu mezbûr Hüseyin Beşe beni i‘fâl eylediğine binâen malından zâmin olmak üzere ve dükkân-ı mezkûrun kirâsından müddet-i ma‘lûmede müsteciri yedinden benim vekâletimle kabz eylediği iki yüz altmış guruşun nısfı olan yüz otuz guruş ve zimmetinde mütekarrir ve ma‘kūdün-aleyh mehr-i müecceli hakkım olan elli guruş ki cem‘an yüz seksen guruşu dahi bana edâya mezbûra tenbîh olunmak matlûbumdur deyü takrîr-i meşruhu üzere tasaddî eylediği meblağ-ı merkūm yedi yüz guruş müdde‘âsı meşrû‘a ve iltifâta şâyân olmadığı kendüye tefhîm ve mâ‘adâ yüz seksen guruş husûs için merkūm Hüseyin Beşe istintâk olundukda cevâbında müdde‘iye-i mezbûre bundan akdem meblağ-ı mecmû‘-ı mezkûr yüz seksen guruş ile bâ-defter-i müfredât eşyâ-yı ma‘lûme mutâlebesinden benimle bi’t-tav‘ ve’r-rızâ yüz elli guruş bedel-i medfû‘ ve makbûza sulh olup mâ‘adâya ve bi’l-cümle zikr olunan husûsa ve sâir cemî‘ hukūk-ı şer‘iyeye müte‘allika mutlakan âmme-i de‘âvî ve kâffe-i mütâlebâtdan benim zimmetimi kabûlümü hâvî ibrâ ve iskāt etmiş idi deyü sûret-i def‘de eylediği da‘vâsını her biri mahâllinde lede’t-tezkiye adl ve makbûlü’ş-şehâde idükleri ihbâr olunan müezzin Molla Ahmed b. Mehmed ve Mehmed Salih b. Mehmed nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘iye-i mezbûre Zenciye Fatıma Hatun da‘vâ-yı mezkûresiyle merkūm Hüseyin Beşe bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı âlîlerine i‘lâm olundu. Fî 2 Muharrem sene 1223.