İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 221 Hüküm no: 190 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Ağa’nın kira akdini feshederek Seyyid Osman ile Şerife Emine’ye devrettiği Kuşluk Hamamı’nı geri istemesi Mehmed Paşa Yokuşu’nda Hamam Ma‘rûz Enderûn-ı hümâyûn’da Kilâr-ı hâssa agavâtından muhrec sâhib-i arzuhâl es-Seyyid Mehmed Ağa b. Mustafa nâm kimesne meclis-i şer‘-i münîrde derûn-ı arzuhâlde mezkûreyi’l-ism es-Seyyid Osman Efendi b. el-Hâc Kasım asâleten ve vâlidesi Şerife Emine bt. Mehmed Salih nâm hatunun hâlâ zevci ve tarafından husûs-ı âti’l-beyânda vekîl olduğu zâtını ârifân Musa Efendi b. Mehmed ve Osman Efendi b. İsmail şehâdetleriyle sâbit olan es-Seyyid İbrahim Efendi b. Ali vekâleten mahzarlarında İstanbul’da Atmeydanı kurbünde Mehmed Paşa Yokuşu nâm mahâlde kâin Kuşluk Hamamı demekle meşhûr bir bâb vakıf Yektâ Hamamı’nın sülüsü mezbûr es-Seyyid Osman Efendi’nin ve sülüsânı vâlidesi müvekkile-i mezbûre Şerife Emine Hatun’un bi’l-icâreteyn taht-ı tasarruflarında olup [24b] mezbûrân es-Seyyid Osman Efendi ve vâlidesi Şerife Emine Hatun sene-i sâbıkā Zilka‘desi gurresinde hamam-ı mezkûru beher şehr yüz iki buçuk guruşa olarak bir sene tamamına değin bana îcâr ve teslîm ben dahi istîcâr ve kabûl ve hamam-ı mezkûrun müsteciri olup derûnunda mevcûde bâ-defter-i müfredât eşyâ-yı ma‘lûmenin mâlik olan gāib ani’l-meclis es-Seyyid Halil nâm kimesneden eşyâ-yı mezkûreyi dokuz yüz kırk dört guruş semen-i medfû‘a iştirâ ve kabz ve bir mikdâr eşyâ-yı ma‘lûme dahi âhardan iştirâ ve hamam-ı mezkûra vaz‘ ve derûnunda iki ay sâkin olmamla müddet-i mezkûrede iki yüz beş guruş kirâsını kendülere edâ eylediğimden mâ‘adâ ben bundan akdemce mezbûrân ile bi’t-terâzî fesh-i akd-i icâre birle hamam-ı mezkûr derûnunda mevcûde eşyâ-yı ma‘lûmeyi mahzar-ı şühûdda takdîm eylediğimizde semen-i misilleri olduğu ihbâr olunan cem‘an bin altı yüz elli altı buçuk guruşa mezbûrân es-Seyyid Osman Efendi ve vâlidesi Şerife Emine Hatun’a bey‘ ve temlik ve hamam-ı mezkûru dahi teslîm eylediğimde onlar dahi ber-vech-i muharrer iştirâ ve temellük ve tesellüm ve kabûl etmeleriyle semen-i mezkûrun altı yüz elli altı buçuk guruşun bin yüz elli altı buçuk guruşunu mezbûrân yedlerinden tamamen ve kâmilen ahz ü kabz edip bâkīsi olan beş yüz guruş zimmetlerinde hâlâ alacak hakkım olup lâkin ben icâre-i mezkûreyi fesheylediğime ve eşyâ-yı mezkûreyi bey‘ime ve hamam-ı mezkûru teslîmime nâdim ve pişman olmamla hamam-ı mezkûru senesi hitâmına değin ke’l-evvel bana îcâr etsinler deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i mezbûr es-Seyyid Mehmed Ağa’ya tefhîm ve da‘vâ-yı mezkûresiyle mezbûrâna bî-vech-i şer‘î mu‘ârazadan men‘ olunup ancak asıl ve vekîl-i mezbûrân meblağ-ı bâkī-i mezkûr beş yüz guruş için istintâk olundukda her biri bi’l-asâle ve bi’l-vekâle ikrâr ü i‘tirâf ve müdde‘î-i mezbûra edâya müte‘ahhid oldukları İstanbul Mahkemesi’nden huzûr-ı [âlîlerine i‘lâm olundu.] Fî 17 Muharrem sene 1223.