İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 222 Hüküm no: 191 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe ve Seyyid İbrahim ve sairlerinin Zeyneb Hatun’un inşa edeceği menzile müdahaleye hakları olmadığı Menzil keşfi, Ma‘rûz Sâdır olan fermân-ı âlîlerine imtisâlen kıbel-i şer‘den mürsel keşif nâibimiz Merhabâzâde Mahmud Efendi ve bi’l-ma‘iye rü’yete memûr Nezâret-i hazret-i Sadâret-penâhîde âsûde evkāf müfettişi müderrisîn-i kirâmdan Şatırzâde Mehmed Emin Efendi tarafından mürsel kâtib Hızırzâde Hayrullah Efendi Hâssa mi‘mâr hulefâsından Mustafa ve Mehmed halîfeler ile İstanbul’da Sultan Bâyezid-i cedîd mahallesinde vâki‘ Nezâret-i Hazret-i müşârün-ileyhâda âsûde evkāfdan Hacce Fatıma Hatun Vakfı’ndan bir bâb menzile mutasarrıfe Zeyneb bt. Mustafa nâm hatunun henüz binâsına şürû‘ eylediği menzile varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eylediklerinde ashâb-ı arzuhâl nezâret-i dâ‘îlerinde âsûde evkāfdan Kabasakal Sinanağa Vakfı’ndan ittisâlinde kâin bir bâb menzile mutasarrıf olan İbrahim Beşe b. İsa ve yine ittisâlinde kâin diğer bir bâb menzile mutasarrıf es-Seyyid İbrahim Efendi b. es-Seyyid Mehmed ve es-Seyyid Mehmed Ârif Beşe b. İbrahim ve es-Seyyid Hüseyin Efendi b. Mehmed ve mu‘arrefetü’z-zât Zülfa Hatun meclis-i ma‘kūd-ı mezkûrda mezbûre Hacce Fatıma Hatun Vakfı mütevellîsi Mustafa Efendi tarafından mürsel vekîli câbî-i vakıf Ali Efendi ve merkūm Kabasakal Sinanağa Vakfı mütevellîsi İmâm Mehmed Salih Efendi hâzır oldukları hâlde derûn-ı arzuhâlde ismi mezkûre zâtı mu‘arrefe mezbûre Zeyneb Hatun mahzarında mezbûre Zeyneb Hatun bu esnâda müceddeden binâsına şürû‘ ve sütûnlarını vaz‘ eylediği menzilinin binâsını bizim menzilimizin hizâsında tarîk-i âm tarafına binâ etmeyüp verâsında bostan tarafına olan tarîk-i âm tarafına binâ etmek üzere mübâşeret edip ve tarafeynine pencereler küşâd eylediği takdîrce bizim menzillerimizin makarr-ı nisvân olan mahallerine nezâret ve zarar-ı beyti olacağı zâhir olmağla ol-vechile mezbûr Zeyneb Hatun bizim menzillerimiz ittisâlinde menzilini binâ etmek üzere mezbûre Zeyneb Hatun’a tenbîh olunmak matlûbumuzdur deyü tasaddî eyledikleri da‘vâlarına şer‘an iltifât olunmadığından mâ‘adâ husûs-ı mezkûr mi‘mârân-ı mezbûrândan istintâk olundukda kat‘a zarar-ı beyti yokdur deyü her biri haber vermeleriyle ol-vechile mezbûre Zeyneb Hatun dahi binâ edeceği menzilinin tarafeynine pencere küşâd etmemek üzere ta‘ahhüd eylediği mevlana-yı mezbûrân mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 14 Muharrem sene 1223.