İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 223 Hüküm no: 192 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keleşoğlu Mustafa Ağa’nın, Sîmkeş esnafından Küçük Ahmed ve sairlerinden haksız olarak aldığı parayı iade etmesi 6090 guruş hüküm Ma‘rûz Âsitâne-i aliyye’de vâki‘ Sîmkeşhâne’de mukaddemâ nâzır olan derûn-ı arzuhâlde mezkûrü’l-ism Keleşoğlu Mustafa Ağa b. el-Hâc Mehmed nâm kimesneden ber-vech-i âtî bin beş yüz guruş iddi‘â eden sâhib-i arzuhâl Küçük Ahmed Ağa b. el-Hâc Hüseyin ve beş yüz guruş iddi‘â eden Ali Efendi b. el-Hâc İbrahim ve dört yüz otuz guruş iddi‘â eden el-Hâc Osman Ağa b. el-Hâc Abdülbâki ve üç yüz guruş iddi‘â eden es-Seyyid Ali Ağa b. es-Seyyid İbrahim ve dört yüz seksen guruş iddi‘â eden es-Seyyid Mustafa Haşim Ağa b. Mehmed Emin ve bin yedi yüz elli guruş iddi‘â eden Mehmed Sadık Ağa b. Ahmed ve üç yüz otuz guruş iddi‘â eden es-Seyyid Mustafa Şükrü Ağa b. Mehmed Emin ve üç yüz guruş iddi‘â eden el-Hâc Ahmed Ağa b. el-Hâc Mehmed ve beş yüz guruş iddi‘â eden es-Seyyid Ahmed Efendi b. es-Seyyid el-Hâc Mustafa nâm dokuz nefer kimesnelerden her biri meclis-i şer‘-i münîrde merkūm Mustafa Ağa muvâcehesinde bizler Sîmkeş esnâfından olup merkūm Mustafa Ağa dahi bir sene mukaddeme gelince nâzırımız olmak takrîbiyle ba‘zılarımızın hânelerini basıp ve ba‘zılarımızın dükkân odalarımızı kapayıp ol-vechile nezâreti hengâmında her birimizi lâ-an-aslin birer cürüm ile ithâm, malımızdan cerîme nâmıyla zulmen ber-vech-i bâlâ cem‘an altı bin doksan guruşumuzu bi-gayrı hakkın ahz ü kabz etmekle meblağ-ı mecmû‘-ı mezkûru mezbûr Mustafa Ağa’dan istirdâd murâdımızdır deyü ba‘de’d-da‘vâ ve’l-istintâk mezbûr Mustafa Ağa cevâbında Sîmkeşhâne-i mezkûrede nâzır olduğunu ikrâr lâkin müdde‘iyûn-ı merkūmûndan kat‘a nesne almadım deyü inkâr etmekle müdde‘iyûn-ı merkūmûndan mezbûr Küçük Ahmed Ağa ber-vech-i muharrer bin beş yüz guruş müdde‘âsını es-Seyyid Mustafa Beşe b. Mehmed ve diğer es-Seyyid Mustafa Beşe b. Ahmed ve mezbûr Ali Efendi kezâlik beş yüz guruş müdde‘âsını Evliyâ İsmail b. Abdullah ve es-Seyyid el-Hâc Mustafa Ağa b. İbrahim ve mezbûr el-Hâc Osman Ağa kezâlik dört yüz otuz guruş müdde‘âsını Ali Ağa b. Yakub ve mezbûr es-Seyyid el-Hâc Mustafa Ağa b. İbrahim ve mezbûr es-Seyyid Ali Ağa kezâlik üç yüz guruş müdde‘âsını İbrahim Ağa b. el-Hâc Mehmed ve Mehmed Sadık Ağa b. Hüseyin ve mezbûr es-Seyyid Mustafa Haşim Ağa kezâlik dört yüz seksen guruş müdde‘âsını Mehmed Beşe b. Mehmed ve merkūm Evliyâ İsmail ve mezbûr Mehmed Sadık Ağa kezâlik bin yedi yüz elli guruş müdde‘âsını Abdullah Beşe b. Hüseyin ve Hasan Beşe b. Ali ve mezbûr es-Seyyid Mustafa Şükrü Ağa kezâlik üç yüz otuz guruş müdde‘âsını Eyüb Beşe b. Ebûbekir ve merkūm Evliyâ İsmail b. Abdullah ve mezbûr el-Hâc Ahmed Ağa kezâlik üç yüz guruş müdde‘âsını İsmail Ağa b. Mehmed ve merkūm Mehmed Beşe b. Mehmed ve mezbûr es-Seyyid Ahmed Efendi kezâlik beşyüz guruş müdde‘âsını mezbûrân es-Seyyid el-Hâc Mustafa Ağa b. İbrahim ve es-Seyyid Mustafa Beşe b. Mehmed nâm kimesneler şehâdetleriyle bi’l-muvâcehe vehc-i vecîh-i şer‘î üzere isbât ve şühûd-ı merkūmûnu tezkiye için kıbel-i şer‘den mürsel tezkiye nâibimiz Süleyman Efendi mârrü’l-beyân Sîmkeşhâne civârına varıp tarafeyn muvâcehelerinde tezkiye ve adl ve makbûlü’ş-şehâde idüklerini cem‘-i gafîr kimesneler ihbâr eylediklerini nâib-i mezbûr mahâllinde tahrîr ve ma‘an meb‘ûs ümenâ-i şer‘le meclis-i şer‘a gelip ve alâ-vukū‘ihî inhâ ve takrîr etmeğin mûcebince meblağ-ı mecmû‘-ı mezkûr altı bin doksan guruşu cem‘an dokuz nefer müdde‘iyûn-ı merkūmûna vech-i meşrûh üzere edâ ve teslîme merkūm Mustafa Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 16 min-Muharrem sene 1223.