İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 224 Hüküm no: 193 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arpacı Seyyid Nasuh Alemdar’a olan borcunu ödemesi hususunda Keleşoğlu Mustafa Ağa’ya tenbih olunması 417 guruş 28 para hüküm Ma‘rûz Arpacı es-Seyyid Nasuh Alemdar b. Mustafa nâm kimesne meclis-i şer‘-i münîrde Âsitâne-i aliyye’de vâki‘ Sîmkeşhâne’de mukaddemâ nâzır olan Keleşoğlu Mustafa Ağa b. el-Hâc Mehmed nâm kimesne muvâcehesinde mezbûr Mustafa Ağa zimmetinde bundan akdem yedimden ve malımdan iştirâ ve kabz eylediği fiyâtı beynimizde ma‘lûm yüz otuz dört keyl şa‘îr semeninden iki yüz dört guruş sekiz para ve ma‘lûmü’l-vezn dakīk semeninden on üç buçuk guruş ve medîne-i Üsküdar’da vâki‘ Kayışpınarı nâm mahâlden Âsitâne-i aliyye’de kendi menziline getirdiğim mâ-i lezîzin araba ve kayık ve hammaliye ücretlerine bi-şarti’r-rücû‘ emriyle malımdan verdiğim iki yüz guruş ki cem‘an dört yüz on yedi guruş yirmi sekiz para alacak hakkım olmağla meblağ-ı mecmû‘-ı mezkûru mezbûr Mustafa Ağa’dan taleb ederim deyü da‘vâ, ol dahi cevâbında ber-vech-i muharrer ikrâr ü i‘tirâf edip lâkin meblağ-ı mecmû‘-ı mezkûr dört yüz on yedi guruş yirmi sekiz parayı müdde‘î-i mezbûra tamamen edâ ve teslîm etmiş idim deyü eylediği def‘ine ikāmet-i beyyine edemeyip bi’t-taleb mezbûr es-Seyyid Nasuh Alemdar bi’l-muvâcehe vech-i şer‘î üzere tahlîf olunmağın mûcebince dâfi‘-i mezbûr Mustafa Ağa def‘-i mezkûruyla müdde‘î-i mezbûra bilâ-beyyine mu‘ârazadan ba‘de’l-men‘ mezbûr Mustafa Ağa’nın sâlifü’l-beyân ikrâr ü i‘tirâfıyla lâzım gelen meblağ-ı mecmû‘-ı mezkûr dört yüz on yedi guruş yirmi sekiz paranın müdde‘î-i mezbûra edâ ve teslîmiyle merkūm Mustafa Ağa ilzâm olunduğu İstanbul Mahkemesi’nden huzûr-ı [âlîlerine i‘lâm olundu.] Fî 16 Muharrem sene 1223.