İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 225 Hüküm no: 194 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Dimitri’nin Sultan Abdülhamid Han Vakfı’ndan olan kasap dükkânları gedik hissesini Dimitri v. Yani’ye satması Boğaziçi’nde Kasab Gedikleri Ma‘rûz Hudâvendigâr-ı esbak Cennet-mekân firdevs âşiyân merhûm Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı şerîfelerinden Yedikule hâricinde vâki‘ ganem salhânelerinden dördüncü salhâneye merbût mahrûse-i Galata’ya muzâfe İstinye nâhiye[sine] tâbi‘ Rumelihisârı’nda kâin iki bâb ve Bebek Bahçesi’nde bir bâb ve Arnavud karyesinde bir bâb ki cem‘an dört bâb kasab dükkânları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin her birinden nısf-ı südüs hisselerine ve yine Beşinci salhâneye merbût Kuruçeşme nâm mahâlde vâki‘ bir bâb kasab dükkânı derûnunda mevcûde kezâlik beyne’l-esnâf gedik ta‘bîr olunur âlât-ı lâzıme-i ma‘lûmenin nısf-ı sümün hissesine bâ-temessük-i mütevellî mutasarrıf olan Nikola v. Dimitri zimmî tarafından husûs-ı âtîde vekîl olduğu es-Seyyid Mustafa b. es-Seyyid Ali ve es-Seyyid Feyzullah b. es-Seyyid Abdurrahman nâm kimesneler şehâdetleriyle sâbit olan Yani v. Kosta zimmî Meclis-i şer‘-i hatîrde Hâssa kasabbaşısı izzetlü Osman Ağa tarafından mürsel Kasablar Kethudâsı Süleyman Ağa ve sâir kasab ustaları hâzır oldukları hâlde kasab ustalığını idâreye kādir idüğü ihbâr olunan zikri âtî tefevvüz edeceği dördüncü salhâneye merbût dört bâb kasab dükkânları gedikleri âlât-ı lâzımelerinden nısf-ı südüs hisselerine ve beşinci salhâneye merbût bir bâb kasab dükkânı gediği âlât-ı lâzımesinden nısf-ı sümün hissesine mukaddemâ mutasarrıf olan bâ‘isü’l-i‘lâm Dimitri v. Yani zimmî muvâcehesinde bi’l-vekâle takrîr-i kelâm edip müvekkilim mersûm Nikola zimmî ber-vech-i muharrer mutasarrıf olduğu âlât-ı lâzıme-i ma‘lûmelerde olan hisse-i şâyi‘a-i mezkûrelerini hüsn-i rızâ ve tayyib-i hâtırı ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî müştereki mersûm Dimitri zimmîye ferâğ ve tefvîz eylediğinde ol dahi ber-vech-i muharrer tefevvüz ve kabûl edip ba‘de’l-yevm sâlifü’l-beyân dört bâb dekâkin derûnlarında mevcûde gedik âlâtının her birinden cem‘an südüs hissesi ve bir bâb dükkân derûnunda mevcûde gedik âlâtının sümün hissesi mersûm Dimitri zimmînin hakk-ı müfevvezi olup müvekkilim mersûmun beş bâb dekâkin-i mezkûre gediklerinde kat‘a alâka ve medhali kalmamışdır dedikde mesfûr Dimitri zimmî dahi ba‘de’t-tasdîk zikri mürûr eden dört bâb kasab dükkânı gediklerinin herbirinden nısf-ı südüs ve bir bâb dükkân gediğinin nısf-ı sümün hisse-i şâyi‘aları fâriğ-i müvekkil-i mersûm Nikola zimmî ferâğından mesfûr Dimitri zimmî üzerine defter-i vakf-ı şerîfe ba‘de’l-kayd mârrü’l-beyân dört bâb dekâkinin her birinden nısf-ı südüs ve bir bâb dükkânın nısf-ı sümün gediklerinin zabtları için temessük-i mezkûra tahrîr ve temhîr iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 17 Muharrem sene 1223.