İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 226 Hüküm no: 195 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Yani’nin kasap dükkânı gediği hisselerini Tilo v. Kosta’ya satması Yeniköy’de 4 Bâb, Kasab gedikleri, Ma‘rûz Hudâvendigâr-ı esbak cennet-mekân firdevs-âşiyân merhûm Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı şerîfelerinden Yedikule hâricinde vâki‘ ganem salhânelerinden dördüncü Salhâneye merbût mahrûse-i Galata’ya muzâfe İstinye nâhiyesine tâbi‘ Rumelihisârı’nda kâin iki bâb ve Bebek Bahçesi’nde bir bâb ve Arnavud karyesinde bir bâb ve yine üçüncü Salhâneye merbût Yeniköy’de Mahkeme kurbünde bir bâb ve Köprübaşı’nda hamam karşısında bir bâb ve Hızırilyas mahallesinde bir bâb ve İstinye çarşısında bir bâb ki cem‘an sekiz bâb kasab dükkânları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin her birinden nısf-ı südüs hisselerine ve yine beşinci salhâneye merbût Kuruçeşme nâm mahâlde vâki‘ bir bâb kasab dükkânı derûnunda mevcûde kezâlik beyne’l-esnâf gedik ta‘bîr olunur âlât-ı lâzıme-i ma‘lûmenin nısf-ı sümün hissesine bâ-temessük-i mütevellî mutasarrıf olan Dimitri v. Yani zimmî tarafından husûs-ı âtîde vekîl olduğu es-Seyyid Mustafa b. es-Seyyid Ali ve es-Seyyid Feyzullah b. es-Seyyid Abdurrahman nâm kimesneler şehâdetleriyle sâbit olan Yani v. Kosta zimmî meclis-i şer‘-i hatîrde Hâssa kasabbaşısı izzetlü Osman Ağa tarafından mürsel Kasablar Kethudâsı Süleyman Ağa ve sâir kasab ustaları hâzır oldukları hâlde kasab ustalığını idâreye kādir idüğü ihbâr olunup zikri âtî tefevvüz edeceği onuncu salhâneye merbût dört bâb kasab dükkânları gedikleri âlât-ı lâzımelerinden nısf-ı südüs hisselerine mukaddemâ mutasarrıf olan bâ‘isü’l-i‘lâm Tilo v. Kosta zimmî muvâcehesinde bi’l-vekâle takrîr-i kelâm edip müvekkilim mersûm Dimitri zimmî bâlâda tafsîl ü beyân olunan dokuz bâb dekâkinden mârrü’z-zikr Rumelihisârı’nda iki bâb ve Bebek Bahçesi’nde bir bâb ve Arnavud karyesinde bir bâb ve Kuruçeşme nâm mahâlde bir bâb ki cem‘an beş bâb dekâkinde olan gedik âlât-ı lâzımesinden hisse-i mezkûrelerini yedinde ibkā ve mâ‘adâ sâlifü’l-beyân onuncu salhâneye merbût Yeniköy’de mahkeme kurbünde bir bâb ve Köprübaşı’nda hamam karşısında bir bâb ve Hızırilyas mahallesinde bir bâb ve İstinye çarşısında bir bâb ki cem‘an dört bâb dekâkinde olan gedik âlât-ı lâzımesinden mutasarrıf olduğu her birinden nısf-ı südüs hisse-i şâyi‘alarını hüsn-i rızâ ve tayyib-i hâtırı ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî mersûm Tilo zimmîye ferâğ ve tefvîz eylediğinde ol dahi ber-vech-i muharrer tefevvüz ve kabûl edip ba‘de’l-yevm sâlifü’l-beyân dört bâb dükkânlar derûnlarında mevcûde gedik ta‘bîr olunur âlât-ı lâzımelerin her birinden cem‘an südüs hisse-i şâyi‘ası mersûm Tilo zimmînin hakk-ı müfevvezi olup müvekkilim mesfûr Dimitri zimmînin nısf-ı südüs hissesinde kat‘a alâka ve medhali kalmamışdır dedikde mersûm Tilo zimmî dahi ba‘de’t-tasdîk gedik-i mezkûrların nısf-ı südüs-i şâyi‘i fâriğ-i müvekkil-i mesfûr Dimitri zimmî ferâğından mersûm Tilo zimmî üzerine tahrîr ve temhîr ve defter-i vakf-ı şerîfe ba‘de’l-kayd mârrü’l-beyân dört bâb dekâkinin her birinden südüs gediklerinin zabtı için müceddeden yedine temessük i‘tâsını istid‘â eylediği İstanbul Mahkemesi’nden huzûr-ı [âlîlerine i‘lâm olundu.] Fî 18 Muharrem sene 1223.