İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 227 Hüküm no: 196 Orijinal metin no: [25a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Dimitri’nin kasap dükkânı gediği hisselerini Tilo v. Kosta’ya satması Yeniköy’de 4 bâb kasab gedikleri, Ma‘rûz Hudâvendigâr-ı esbak cennet-mekân firdevs-âşiyân merhûm Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı şerîfelerinden Yedikule hâricinde vâki‘ ganem salhânelerinden onuncu salhâneye merbût mahrûse-i Galata’ya muzâfe İstinye nâhiyesine tâbi‘ Yeniköy’de mahkeme kurbünde bir bâb ve Köprübaşı’nda hamam karşısında bir bâb ve Hızırilyas mahallesinde bir bâb ve İstinye çarşısında bir bâb ki cem‘an dört bâb kasab dükkânları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin her birinden nısf-ı südüs hisselerine bâ-temessük-i mütevellî mutasarrıf olan Nikola v. Dimitri nâm zimmî tarafından husûs-ı âtîde vekîl olduğu es-Seyyid Mustafa b. es-Seyyid Ali ve es-Seyyid Feyzullah b. es-Seyyid Abdurrahman nâm kimesneler şehâdetleriyle sâbit olan Yani v. Kosta zimmî meclis-i şer‘-i münîrde Hâssa kasabbaşısı izzetlü Osman Ağa tarafından mürsel Kasablar Kethudâsı Süleyman Ağa ve sâir kasab ustaları hâzır oldukları hâlde kasab ustalığını edâya kādir idüğü ihbâr olunan bâ‘isü’l-i‘lâm Tilo v. Kosta zimmî muvâcehesinde bi’l-vekâle takrîr-i kelâm edip müvekkilim mersûm Nikola zimmî ber-vech-i bâlâ dört bâb dekâkin derûnlarında olan gedik âlât-ı lâzımesinden mutasarrıf olduğu her birinden nısf-ı südüs hisse-i şâyi‘alarını hüsn-i rızâ ve tayyib-i hâtırı ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî mersûm Tilo zimmîye ferâğ ve tefvîz eylediğinde ol dahi ber-vech-i muharrer tefevvüz ve kabûl edip ba‘de’l-yevm sâlifü’l-beyân dört bâb dükkânlar derûnlarında mevcûd gedik ta‘bîr olunan âlât-ı lâzıme-i ma‘lûmelerin her birinden nısf-ı südüs hisse-i şâyi‘ası mersûm Tilo zimmînin dâhil-i havza-i tasarrufu olup müvekkilim mersûm Nikola zimmînin kat‘a alâka ve medhali kalmamışdır dedikde mersûm Tilo zimmî dahi ba‘de’t-tasdîk gedik-i mezkûrların nısf-ı südüs-i şâyi‘i fâriğ-i müvekkil-i mersûm Nikola zimmî ferâğından mersûm Tilo zimmî üzerine tahrîr ve temhîr ve defter-i vakf-ı şerîfe ba‘de’l-kayd mârrü’l-beyân dört bâb dekâkinin her birinde nısf-ı südüs gediklerinin zabtları için yedine müceddeden temessük i‘tâsını istid‘â eylediğini İstanbul Mahkemesi’nden huzûr-ı [âlîlerine i‘lâm olundu.] Fî 17 Muharrem sene 1223.