İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 228 Hüküm no: 197 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Feyzullah’ın kasap dükkânı hissesini Seyyid Mustafa’ya satması Tophâne’de kasab gedikleri Ma‘rûz Hudâvendigâr-ı esbak cennet-mekân firdevs âşiyân merhûm Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı şerîfelerinden Yedikule hâricinde vâki‘ ganem salhânelerinden birinci salhâneye merbût mahrûse-i Galata’ya muzâfe kasaba-i Tophâne kapısı ittisâlinde kâin derûnunda salhânesiyle bir bâb ve yine salhâne-i mezkûreye merbût kasaba-i mezbûrede Manavlar içinde kâin bir bâb ki cem‘an iki bâb kasab dükkânları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelere bâ-temessük-i mütevellî müstakıllen mutasarrıf olan es-Seyyid Feyzullah b. es-Seyyid Abdurrahman meclis-i şer‘-i münîrde hâssa kasabbaşısı izzetlü Osman Ağa tarafından mürsel kasablar kethudâsı Süleyman Ağa ve sâir kasab ustaları hâzır oldukları hâlde kasab ustalığını idâreye kādir idüğü ihbâr olunan bâ‘isetü’l-i‘lâm es-Seyyid Mustafa b. es-Seyyid Ali muvâcehesinde takrîr-i kelâm edip ber-vech-i muharrer mutasarrıf olduğum âlât-ı lâzıme-i ma‘lûmelerin dörder sehm i‘tibârıyla üçer sehmini yedimde ibkā ve mâ‘adâ birer sehm-i şâyi‘lerini hüsn-i rızâ ve tayyib-i hâtırım ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî merkūm es-Seyyid Mustafa’ya ferâğ ve tefvîz eylediğimde ol dahi ber-vech-i muharrer tefevvüz ve kabûl edip ba‘de’l-yevm sâbıku’l-beyân iki bâb dükkânlar derûnlarında mevcûde gedik ta‘bîr olunan âlât-ı lâzıme-i ma‘lûmelerin birer rub‘-ı şâyi‘inde benim alâka ve medhalim kalmayıp merkūm es-Seyyid Mustafa’nın dâhil-i havza-i tasarrufu olmuşdur dedikde merkūm es-Seyyid Mustafa dahi ba‘de’t-tasdîk gedik-i mezkûrların birer rub‘u fâriğ-i mezbûr ferâğından merkūm es-Seyyid Mustafa üzerine tahrîr ve temhîr ve defter-i vakf-ı şerîfe ba‘de’l-kayd mârrü’l-beyân iki bâb dükkânların birer rub‘ gediklerinin zabtları için müceddeden yedine temessük i‘tâsını istid‘â eylediği İstanbul Mahkemesi’nden huzûr-ı [âlîlerine i‘lâm olundu.] Fî 17 Muharrem sene 1223.