İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 231 Hüküm no: 199 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nefise bt. Mehmed’in Molla Hasan aleyhindeki iplikçi dükkânı gediği davası İplikçi gediği men‘i Ma‘rûz İstanbul’da Davudpaşa mahallesinde sâkinler Nefise bt. Mehmed nâm hatunun zevci ve tarafından husûs-ı âtîde vekîl olduğu zâtını ârifân Ömer Efendi b. Ebâbekir ve es-Seyyid İbrahim b. es-Seyyid Mehmed nâm kimesneler şehâdetleriyle sâbit olan Mehmed Said Ağa b. Hüseyin nâm kimesne meclis-i şer‘-i münîrde Molla Hasan b. Osman nâm kimesne muvâcehesinde tâcirler kethudâsı İsmail Ağa ve Yiğitbaşı Molla Mustafa ve sâirleri hâzır oldukları hâlde İstanbul’da Mercan Çarşısı nâm mahâlde Pasdırmacılar Hanı hâricinde kâin bir bâb İplikçi dükkânının nısf-ı şâyi‘i zevcem müvekkilem mezbûre Nefise Hatun’un ve nısf-ı şâyi‘-i âharı mezbûr Molla Hasan’ın bi’l-icâreteyn iştirâken ve şâyi‘an taht-ı tasarruflarında ve dükkân-ı mezkûrun hevâyî gediği aklâmdan birinde mukayyed ve mu‘teber olmayarak müstakılleten zevcem müvekkilem mezbûrenin vâlidesinden mevrûse bilâ-sened yedinde olup ve mezbûr Molla Hasan dükkân-ı mezkûrda sâkin ve nısf dükkânın kirâ-yı kadîmini müvekkilem zevcem mezbûreye mâh be-mâh edâ edip lâkin gedik kirâsı nâmıyla kat‘a nesne vermemekle ba‘de’l-yevm beher şehr ikişer guruş gedik kirâsı vermek üzere mezbûr Molla Hasan’a tenbîh olunmak bi’l-vekâle matlûbumdur deyü takrîr-i meşrûhu üzere tasaddî eylediği gedik da‘vâsı meşrû‘a ve iltifâta şâyân olmadığı müdde‘î-i vekîl-i mezbûra tefhîm olunup ancak istikşâf-ı hâl için esnâf-ı hâzırûn-ı merkūmûn istintâk olunduklarında onlar dahi cevâblarında dükkân-ı mezkûrda mâ-tekaddümden beri gedik i‘tibâr olunmayıp fakat nısf dükkân-ı mezkûrun kirâ-yı kadîmini mezbûr Molla Hasan müvekkile-i mezbûre Nefise Hatun’a mâh be-mâh cevr ü ezâ etmeksizin edâ edegeldiği cümlemizin ma‘lûmudur deyü her biri haber vermeleriyle ol-vechile müdde‘î-i vekîl-i mezbûr müvekkilesi zevce-i mezbûreye izâfetle gedik da‘vâsıyla merkūm Molla Hasan’a bî-vech mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu.] Fî 28 Zilka‘de sene 1222.