İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 232 Hüküm no: 200 Orijinal metin no: [25b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvanister v. Valis’in vârislerinden Eleniko, Anaştaş ve Katerina’nın Hıristo v. Yorgi aleyhindeki berber gediği davasında anlaşma sağlanması Tarabya’ya berber gediği, Ma‘rûz Mahrûse-i Galata’ya muzâfe kasaba-i İstinye nâhiyesine tâbi‘ Tarabya’da mütemekkin iken bundan akdem hâlik olan berber esnâfından Yuvanister v. Vasil nâm zimmînin verâseti zevce-i metrûkesi Eleniko bt. İstori nâm Nasrâniye ile sulbî kebîr oğlu Anaştaş ve sulbiye kebîre kızı Fotni ve sagīre kızı Katerina’ya münhasıra olduğu lede’ş-şer‘i’l-enver zâhir ve mütehakkık oldukdan sonra mersûm Nikola zimmî ile şahsı mu‘arrefe olan mesfûre Fotni Nasrâniye asâleten ve kezâlik şahsı mu‘arrefe zevce-i mesfûre Eleniko Nasrâniye kendi nefsinden asâleten ve sagīrân-ı mersûmân Anaştaş ve Katerina’nın anaları ve vasîyy-i mansûbeleri olmağla vesâyeten meclis-i şer‘-i münîrde zikri âtî gedik âlâtının nısfına vaz‘-ı yedi mütehakkık olan Hıristo v. Yorgi nâm zimmî muvâcehesinde sâlifü’z-zikr Tarabya’da iskele başında vâki‘ Başmuhâsebe’de mukayyed ve mu‘teber bir bâb berber dükkânı hâlik-i mersûmun taht-ı icâresinde derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin mecmû‘u mûrisimiz hâlik-i mesfûrun sağlığında ile’l-helâk yedinde mülkü olup ba‘de helâkihî bizimle sagīrân-ı mersûmâna mûris olmağla ancak mersûm [26a] Hıristo zimmî dükkân-ı mezkûrda haftada beşer guruş kirâ ile müstecir olmak takrîbiyle gedik-i mezkûrun nısfı benimdir deyü müdâhale [ve] icâre-i mezkûreden işbu târihe gelince on dört ayda zimmetinde müctemi‘ olan iki yüz seksen guruşu dahi edâda mümâna‘at etmekle suâl olunup gedik-i mezkûr ile meblağ-ı merkūm iki yüz seksen guruşu bize edâya mersûm Hıristo zimmîye tenbîh olunmak bi’l-asâle ve bi’l-vesâye matlûbumdur deyü ba‘de’d-da‘vâ ve’l-istintâk mersûm Hıristo zimmî cevâbında gedik ta‘bîr olunan âlât-ı lâzıme-i mezkûrenin mecmû‘u hâlik-i mesfûr Yuvanister zimmînin yedinde mülkü iken zimmî-yi mersûm sağlığında ve kemâl-i akl ü sıhhatinde bin iki yüz on dokuz senesi Zilka‘desi’nin on sekizinci günü mahrûse-i mezbûre mahkemesinde hilâfeten müvellâ olan müderrisîn-i kirâm-ı zevi’l-ihtirâmdan Uryânîzâde Mehmed Râşid Efendi huzûrunda gedik-i mezkûrun nısf-ı şâyi‘ini yedinde ibkā ve nısf-ı şâyi‘-i âharını bey‘-i bâtt-ı sahîh-i şer‘î ile altı yüz elli ğuruş semen-i medfû‘ ve makbûza bana bey‘ ve temlik ve vech-i lâyıkı üzere teslîm eylediğinde ben dahi iştirâ ve temellük ve tesellüm ve kabûl edip mebî‘-i mezkûrun tağrîr ve gabnine müte‘allika âmme-i da‘vâdan her birimiz âharın zimmetini kabûlü hâvî ibrâ ve iskāt etmemizle ol-vechile târih-i mezbûrdan beri nısf gedik-i mezkûr benim yedimde mülküm olduğuna binâen derûnunda sâkin ve bi-hakkın vaz‘-ı yed etmemle nısf-ı âharı için dahi kâh şehriye beşer guruş ve kâh şehriye üçer guruş verip bu âna kadar kat‘a icâreden deynim yokdur deyüp evvelâ takrîrine mutâbık ve hâkim-i mûmâ-ileyhin imzâ ve hâtemini hâvî ibrâz eylediği bir kıt‘a hüccet-i şer‘iyenin mazmûnunu ve semen-i meblağ-ı merkūm altı yüz elli guruşu hâlik-i mesfûra teslîmini udûlden Berberler Kethudâsı es-Seyyid el-Hâc Mustafa Ağa b. es-Seyyid el-Hâc Ahmed ve es-Seyyid Ahmed Ağa b. İbrahim nâm kimesneler şehâdetleriyle isbât etmeğin mûcebince müdde‘ûn-ı asîl ve vasîyy-i mersûmûn nısf gedik-i mezkûr mütâlebesiyle mesfûr Hıristo zimmîye bî-vech-i şer‘î mu‘ârazadan ba‘de’l-men‘ verese-i müdde‘iyûn-ı mersûmûn sâlifü’z-zikr kirâ müdde‘âlarından dahi nef‘an li’l-yetîm mersûm Hıristo zimmî ile bi’t-tav‘ ve’r-rızâ yüz on guruş bedel-i medfû‘ ve makbûza ba‘de akdi’l-musâlahati ve’l-kabûl mâ‘adâya ve bi’l-cümle husûs-ı mezkûra müte‘allika âmme-i de‘âvî ve kâffe-i mutâlebâtdan mesfûr Hıristo zimmînin zimmetini kabûlü hâvî bi’l-asâle ibrâ ve iskāt edip ve husûs-ı mezkûra dâir vasîyy-i mersûme Eleniko Nasrâniye dahi vesâyeten kat‘a da‘vâ ve nizâ‘ ve husûmetim yokdur dediklerinde mersûm Hıristo zimmî dahi mukırrûn-ı mersûmûnu tasdîk ve bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 17 min-Muharrem sene 1223.