İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 233 Hüküm no: 201 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Kosta’nın elinden alınan dükkân için Seyyid Ahmed’e ödemiş olduğu kirayı geri alması Koska’da bakkāl gediği Ma‘rûz Kasab Kosta v. Mitro nâm zimmî meclis-i şer‘-i münîrde manav tâifesinden Civelekoğlu es-Seyyid Ahmed b. es-Seyyid Mehmed nâm kimesne muvâcehesinde İstanbul’da Koska kurbünde şekerci dükkânı karşısında vâki‘ bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin mecmû‘u mezbûr es-Seyyid Ahmed’in yedinde mülkü iken mezbûr es-Seyyid Ahmed dükkân-ı mezkûrun verâsında olup yedek ve fıçı ve sâir külliyetli emti‘a vaz‘ olunacak mahâlli gedik benimdir, beher şehr kirâsını mutasarrıfına ben malımdan edâ ederim, senden kirâ mütâlebe etmezler diyerek yedimden makbûzu olan iki yüz altmış guruşa bana bey‘, ben dahi iştirâ ve kabûl ve mahâll-i mezkûra bârgir bağlayıp ba‘dehû mezbûr es-Seyyid Ahmed mecmû‘u gedik-i mezkûru bin iki yüz yirmi bir senesi Cemâziyelâhire’nin on birinci günü mahkeme-i mezbûrede sekiz yüz elli guruş semen-i makbûza gāibân ani’l-meclis Yuvan v. Mihal ve Azerya v. Anaştaş zimmîlere ale’l-iştirâk bâ-hüccet bey‘ ve temlik ve teslîm edip onlar dahi ba‘de’l-iştirâ ve’t-temellük dükkân-ı mezkûre duhûl ve mahâll-i mezkûr dükkânımıza mülhak olmağla bizim taht-ı icâremizdedir deyü beni mahâll-i mezkûrdan ihrâc etmeleriyle ben dahi mezbûr es-Seyyid Ahmed’e medfû‘um olan meblağ-ı merkūm iki yüz altmış guruşu mezbûrdan istirdâd murâdımdır deyü da‘vâ etdikde ol dahi cevâbında kaziyye minvâl-i meşrûh üzere olduğunu bi-tamamihi tâyi‘an ve kat‘iyyen ikrâr ü i‘tirâf etmeğin mûcebince makbûzu olan meblağ-ı merkūm iki yüz altmış guruşu müdde‘î-i mersûma red ve teslîme mezbûr es-Seyyid Ahmed’e tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî 16 min-Muharremi’l-harâm sene 1223.