İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 234 Hüküm no: 202 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici esnafı Yiğitbaşısı Seyyid Ahmed ve sair esnaf ileri gelenlerinin, sanatında hile yapan Kayserili Mehmed’in esnaflıktan çıkarılması talepleri Dikicilere dâir Ma‘rûz Âsitâne-i aliyye’de vâki‘ dikici esnâfının Başyiğitbaşısı es-Seyyid Ahmed ve Mesciler Yiğitbaşısı Ahmed Usta ve ihtiyârlarından el-Hâc Mehmed Ağa ve Abdullah Alemdar ve Ahmed Ağa ve Çedikçiler kethudâsı İsmail Usta ve ihtiyârlarından İbiş Usta ve es-Seyyid İbrahim Usta ve Musa Usta ve Mehmed Usta ve Tâcirler Kethudâsı vekîli Yiğitbaşı Molla Mustafa ve ihtiyârlarından es-Seyyid el-Hâc Mustafa Ağa ve es-Seyyid Hasan Ağa ve Memiş Ağa ve el-Hâc Mehmed Ağa ve Parlakoğlu el-Hâc Hasan Ağa ve Ahmed Ağa ve Hacı Odabaşı ve sâirleri meclis-i şer‘-i münîrde Dikicibaşı Süleyman Ağa hâzır olduğu hâlde Sayalmacı tâifesinden Kayseriyeli Camuscuoğlu Mehmed b. İbrahim nâm kimesne muvâcehesinde mezbûr Mehmed sahtiyân tüccârından olup sayalma ta‘bîr olunur dikilmiş mest i‘mâl ve bey‘ine mezûn olmağla sâirleri misillü mahâllinde iştirâ eylediği sahtiyânın bir mikdârını a‘lâ ve evsat ve ednâ olarak mest i‘mâl ve mâ‘adâ sahtiyânları yine a‘lâ ve evsat ve ednâ olarak Âsitâne-i aliyye’ye celb ve fiyât-ı maktû‘asıyla esnâfa bey‘ etmeyip iştirâ eylediği sahtiyânın mecmû‘-ı a‘lâsını mahâllinde sayalma ta‘bîr olunur mest i‘mâl ve külliyetlisini esnâ-yı râhda telef ve mâ‘adâ bir mikdârını Âsitâne-i aliyye’ye getirip gālî bahâ ile ibâdullâha bey‘le ızrâr ve mâ‘adâ ednâ ve çürük sahtiyânları dahi a‘lâ bahâsına bey‘ eylemesi ibâdullâhın mağbûn ve mutazarrır ve bizim nizâm ve intizâmımıza mugāyir olduğundan mâ‘adâ giderek sâir bu makūle sayalmacılara sirâyet ile külliyen nizâmımızın ihtilâlini mûcib ve ayakkabı nizâmının fesâdını müstevcib bir keyfiyet olduğuna binâen bi’d-defa‘ât mezbûra tenbîh olundukda mütenebbih olmayıp hattâ işbu meclis-i şer‘de mu‘âyene olunup a‘lâ bahâsına bey‘ eylediği sahtiyân ednâdan dahi dûn olup ol-vechile ızrârında ısrâr üzere olmağla nizâmlarımızı vikāye zımnında mezbûrun tard ve teb‘îdi matlûbumuzdur deyü muvâcehesinde hâzır-ı mezbûr Dikicibaşı Süleyman Ağa’nın tasdîkiyle iştikâ ve esnâfdan ihrâcını iltimâs ve istid‘â eyledikleri İstanbul Mahkemesi’nden huzûr-ı [âlîlerine i‘lâm olundu.] Fî 17 Muharrem sene 1223