İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 235 Hüküm no: 203 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fesçi esnafından Hacı Mehmed Emin’in esnaflıktan çıkarılması Fesci esnâfına dâir Ma‘rûz İstanbul ve Galata fesciyânı ta‘bîr olunur esnâfın İstanbul Fesciyânı Kethudâsı Süleyman Ağa ve Galata Fesciyânı Kethudâsı el-Hâc İsmail Ağa’nın vekîli Ömer Ağa ve Yiğitbaşıları es-Seyyid Mustafa ve Çavuşları Ramazan ve müsinn ü ihtiyârlarından el-Hâc Şa‘bân Tıraveli ve el-Hâc Ömer Hoca ve Yahya Irakî? ve es-Seyyid Mehmed Bozyed ve Süleyman b. Asâkir ve el-Hâc Mehmed Cibâli ve Kasım Cezar ve İçli Mehmed İzmîrî ve İsmail Ferhad ve el-Hâc Ramazan Traveli ve İsmail b. Abdullah ve Salih b. Molla İsa? ve Yahya Kafkut ve sâir bi’l-cümle fesciyân esnâfı meclis-i şer‘-i münîrde biz esnâf-ı merkūmeden el-Hâc Mehmed Emin b. İsmail nâm kimesne mahzarında merkūm el-Hâc Mehmed Emin esnâfımızdan olup lâkin kendi hâlinde ırzıyla mukayyed ve kâr ü kisbiyle meşgūl olmayıp dâimâ esnâfımız beyninde fesâd ilkāsıyla ihtilâl-i nizâm-ı kadîmimizi mûcib hâlâta ictisâr ve beynimizde düstûrü’l-amel olan şurût-ı mer‘iyemizin izmihlâline bâ‘is ü bâdî olup bi’d-defa‘ât kendüye tenbîh olundukda kat‘a mütenebbih olmayıp ızrâr-ı ısrâr üzere olup hattâ işbu yedimizde olan bir kıt‘a i‘lâm mantûkunca mezbûr el-Hâc Mehmed Emin’e kıbel-i şer‘den bir def‘a dahi dükkânında kâr ü kisbiyle meşgūl olup umûr-ı esnâfa müdâhale ve ta‘arruz etmemek üzere tenbîh olunmuş iken yine mütenebbih olmayıp mezbûrun dâimâ bu makūle ihtilâl-i nizâmı mûcib harekât-ı [26b] nâ-marzıyesinden cümlemizin bi’l-külliye emn ve rahatımız meslûb olmağla kendüden bir vechile hoşnûd ve râzı değilleriz deyü muvâcehesinde teşekkî ve mezbûrun sû-i hâlini ihbâr ve fîmâ-ba‘d içimizden tard ve teb‘îd ve kâr-ı âhara sülûke tenbîh olunmak matlûbumuzdur deyü istid‘â eylediklerinde mezbûr el-Hâc Mehmed Emin dahi rızâsıyla esnâf-ı merkūmeden hurûc ve kâr-ı âhara sülûk etmek üzere müte‘ahhid olup bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 21 Muharrem sene 1223.