İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 236 Hüküm no: 204 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Rado’nun, bakkal dükkânı gediği satışı ile ilgili Aci Todori aleyhindeki davasının reddedilmesi Tahtakale’de bakkāl dükkânı nizâ‘ı Ma‘rûz Bakkāl tâifesinden Yorgi v. Rado nâm zimmî meclis-i münîrde yine tâife-i merkūmeden Aci Todori v. Apramonos nâm zimmî muvâcehesinde sarrâf tâifesinden olup bundan akdem hâlik olan Ohannes v. Ağyazar nâm zimmînin verâseti zevce-i metrûkesi Derohi bt. Mardıros Nasrâniye ile sulbî kebîr oğulları Ağyazar ve Karabet ve Ohan zimmîlere ve sagīr oğulları Takofor ve Manil ve Yakof ve sulbiye sagīre kızı Sare’ye münhasıra oldukdan sonra sıgār-ı mersûmûnun anaları ve bâ-hüccet vasîleri zevce-i mesfûre Derohi Nasrâniye ile mersûmûn Ağyazar ve Karabet ve Ohan zimmîler taraflarından husûs-ı âti’l-beyânda vekîl olduğu şahs-ı mersûmeyi ârifân Keresteci Manil v. Karabet ve Sarrâf hizmetkârı Karabet v. Ağob zimmîler şehâdetleriyle sâbit olan zevce-i mersûmenin üveyi karındaşı Sarrâf Mardıros v. Karabet zimmî hâzır olduğu hâlde İstanbul’da Tahtakale’de Dörtyol Ağzı nâm mahâlde kâin el-Hâc Ali dükkânı demekle ma‘rûf bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla kırk sehmi gāib ani’l-meclis Tanaş zimmînin ve kırk sehmi benim ve kırk sehmi hâlik-i mersûmun sağlığında ile’l-helâk yedimizde iştirâken ve şâyi‘an mülk ve hakkımız olup ba‘de helâkihî kırk sehm hissesi veresesi mersûmûna mevrûs oldukdan sonra vekîl-i mesfûr âlât-ı lâzıme-i muharrere-i mezkûrede müvekkilleri verese-i mersûmûnun mâlik oldukları ber-i‘tibâr-ı merkūm kırk sehm hisse-i şâyi‘ayı benim izin ve icâzetim ve haber ve âgâhım yoğiken işbu mesfûr Aci Todori zimmîye sekiz yüz otuz üç guruş kırk akçe semen-i makbûza bi’l-vekâle bâ-hüccet-i şer‘iye bey‘ ve temlik ve vech-i lâyıkı üzere teslîm ol dahi iştirâ ve temellük ve tesellüm ve kabûl edip mebî‘-i mezkûrun tağrîr ve gabnine müte‘allika âmme-i da‘vâdan her biri âharın zimmetini bi’l-asâle ve bi’l-vekâle kabûlü hâvî ibrâ ve iskāt edip lâkin ben bey‘-i mezkûru istimâ‘ etdiğim anda mücîz olmamamla semen olmak üzere verese-i mersûmûna medfû‘u olan meblağ-ı merkūmu yedimden ahz birle iştirâ eylediği âlât-ı mezkûrede olan kırk sehm hisse-i şâyi‘ayı bana bey‘ eylesin deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmayıp istikşâf-ı hâl için mersûm Aci Todori zimmî istintâk olundukda ol dahi cevâbında vekîl-i hâzır-ı mersûm hisse-i mezkûreyi bey‘ esnâsında müdde‘î-i mersûma teklif eyledikde ol dahi bana lüzûmu yokdur deyü şirâdan imtinâ‘ ve muvâcehesinde ben iştirâ eyledim deyü eylediği takrîrini Pazarbaşı Süleyman Ağa ve Bölükbaşı es-Seyyid Ahmed ve sâir nizâm ustaları haber vermeleriyle mûcebince müdde‘î-i mersûm Yorgi zimmî da‘vâ-yı mezkûresiyle mesfûr Aci Todori zimmîye bî-vech-i şer‘î mu‘ârazadan men‘ olunduğu İstanbul Mahkemesi’nden huzûr-ı [âlîlerine i‘lâm olundu.] Fî 27 Zilka‘de sene 1222.