İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 238 Hüküm no: 206 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve civarında olan fırancalacı dükkânlarının sayısının 11’e çıkarılması ve Bali köyünde Dimitri’nin ihdas ettiği fırın için ruhsat taleb olunması Francalacı fırınlarına dâir Ma‘rûz Nizâm ve şurûtlarına nazaran muktezâsını i‘lâm eyleyesiz deyü sâdır olan emr-i âlîlerine imtisâlen nazar olundukda bundan akdem İstanbul ve havâlîsinde mahâll-i ma‘lûmede yedi aded fırancalacı fırınları ibkā mâ‘adâsı bâ-irâde-i hazret-i şehin-şâhî bi’l-külliye sedd ü bend ve hilâfına ruhsat verilmeyeceği işbu derkenârda müstebân iken bundan mukaddemce cennet-mekân firdevs-âşiyân Sultan Abdülhamid Han-ı Gāzi -aleyhi’r-rahmetü ve’l-gufrân- hazretlerinin beylerbeyi ve Mîrgünoğlu nâm mahallerde müceddeden inşâ buyurdukları cevâmi‘-i şerîfe ve âsâr-ı celîleleri evkāfından mahâlleyn-i merkūmeynde iki aded ve mehd-i ulyâ-yı saltanat devletlü ismetlü efendimiz hazretlerinin Gümrükçü Çiftliği derûnunda kâin bir aded ve Çelebi Hasan Paşa Vakfı’ndan Kumkapı hâricinde vâki‘ İstefan ve Ohannes ve Mücavir nâm zimmîlerin mutasarrıf oldukları bir aded francala fırınları ki cem‘an dört aded fırınlar sâire makīs olmayıp evkāf-ı şerîfe-i mezkûreden olmalarıyla sâire sirâyet etmemek ve bir vakitde emsâl olarak kaydı derkenâr olmamak şartıyla dört aded fırınların küşâdıyla on bir adede iblâğı husûsuna irâde-i seniyye-i kātı‘a-i cihân-dârî ta‘alluk etmekle ancak dört aded francalacı fırınlarının küşâdını ruhsatı hâvî emr-i âlî-şân mûcebince on bir aded fırancalacı fırınlarından mâ‘adâ bir mahâlde fırın küşâd ve fırancala tabh ve i‘mâl ve bey‘ine ruhsat verilmeye deyü musarrah olmağla istid‘â olunan Bali karyesinde Dimitri kullarının bundan akdem ihdâs eylediği nân-ı hâs fırınının küşâdı hususu kuyûdâtına ba‘de’n-nazar muktezâsı ancak irâde-i seniyye-i kātı‘a-i hazret-i cihân-dârîye mütevakkıf olur mevâddan olduğu İstanbul Mahkemesi’nden huzûr-ı [âlîlerine i‘lâm olundu.] Fî-gurreti Saferi’l-hayr sene 1223.