İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 239 Hüküm no: 207 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki pirinçci dükkânı gedikleri nizamı İstanbul Ağası Sokağı’nda pirinçci gediklerine dâir. Ma‘rûz İşbu arzuhâl ve rabt olunan defterde mücerred dekâkin derkenârda mastûr mu‘teber gediklerden olmağla sâbıkı mûcebince gedik kayd olunmaları husûsunu i‘lâm eyleyesin deyü bu dâ‘îlerine hitâben sâdır olan fermân-ı âlîlerine imtisâlen işbu arzuhâl ve rabt olunan deftere nazar olundukda Bahçekapısı hâricinde İstanbul Ağası sokağı karşısında kâin bir tarafdan Arpaçılar ve bir tarafdan bakkāl dükkânı ve bir tarafdan cidâr-ı hısn ve taraf-ı râbi‘i tarîk-i âm ile mahdûd fevkınde iki bâb oda ve tahtında bodrumuyla bir bâb pirinçci mahzeni gediğinin mâlik es-Seyyid el-Hâc Abdulkādir Ağa ve Eminönü’nde Sebzehâne sokağında köşe başında vâki‘ bir tarafdan duhâncı dükkânı ve bir tarafdan Şerif Osman dükkânı ve bir tarafdan İstanbul Ağası’nın Hatab meydanı ve bir tarafdan tarîk-i âm ile mahdûd fevkınde bir odasıyla bir bâb pirinçci mahzeni gediğinin mâlik Molla Mustafa ve yine Sebzehâne sokağı derûnunda kâin bir tarafdan Pirinçci Molla Mustafa ve bir tarafdan Papasoğlu dükkânı ve bir tarafdan yine Hatap meydanı ve bir tarafdan tarîk-i âm ile mahdûd fevkınde bir odasıyla bir bâb Pirinçci mahzeni gediğinin mâliki Pirinçci Şerif Osman Ağa ve yine mahâll-i mezkûrda vâki‘ bir tarafdan Pirinçci Şerif Osman ve bir tarafdan Rukiye Hanım ile Yuvan zimmînin müşterek dükkânları ve bir tarafdan yine Hatab meydanı ve bir tarafdan tarîk-i âm ile mahdûd fevkınde bir odasıyla bir bâb pirinçci mahzeni gediğinin iştirâken mâlikleri Papasoğlu Yovakim ve Kostandi zimmîler ve yine mahâll-i mezkûrda vâki‘ bir tarafdan Pirinçci Ömer Ağa ve şerîki Molla Ahmed’in müşterek dükkânları ve bir tarafdan Papasoğlu Yovakim ve şerîki Kostandi zimmîlerin müşterek dükkânları ve bir tarafdan yine Hatap meydanı ve bir tarafdan tarîk-i âm ile mahdûd fevkınde bir odasıyla bir bâb pirinçci mahzeni gediğinin iştirâken mâlikleri mezbûre Rukiye Hanım bt. el-Hâc Ahmed Ağa ile Yuvan zimmî ve yine mahâll-i mezkûrda kâin bir tarafdan mezbûre Rukiye Hanım ile mersûm Yuvan zimmînin müşterek dükkânları ve bir tarafdan Şerife Hafize Hatun dükkânı ve bir tarafdan yine Hatab meydanı ve bir tarafdan tarîk-i âm ile mahdûd fevkınde bir odasıyla bir bâb pirinçci mahzeni gediğinin iştirâken mâlikleri pirinçci Ömer Ağa ve Molla Ahmed ve yine mahâll-i mezkûrda vâki‘ bir tarafdan Pirinçci Ömer Ağa ve Molla Ahmed’in müşterek dükkânları ve bir tarafdan mezbûre Şerife Hafize Hatun dükkânı ve bir tarafdan yine Hatab meydanı ve bir tarafdan tarîk-i âm ile mahdûd fevkınde bir odasıyla bir bâb pirinçci mahzeni gediğinin mâlikesi mezbûre Şerife Hafize Hatun bt. es-Seyyid Ahmed Ağa ve yine mahâll-i mezkûrda vâki‘ bir tarafdan mezbûre Rukiye Hanım dükkânı ve bir tarafdan sebzeci Sabina zimmî dükkânı ve bir tarafdan Hınnacı mahzeni ve bir tarafdan tarîk-i âm ile mahdûd fevkınde bir odasıyla bir bâb pirinçci mahzeni gediğinin mâliki pirinçci Ömer Ağa ve yine mahâll-i mezkûrda kâin bir tarafdan pirinçci Ömer Ağa dükkânı ve bir tarafdan el-Hâc Abdülkerim ile Kara Hüseyin Çavuş mahzeni ve bir tarafdan hınnacı mahzeni ve bir tarafdan tarîk-i âm ile mahdûd fevkınde bir odasıyla bir bâb pirinçci mahzeni gediğinin mâlikesi mezbûre Rukiye Hanım bt. el-Hâc Ahmed Ağa ve yine mahâll-i mezkûrda kâin bir tarafdan mezbûre Şerife Hafize Hatun dükkânı ve bir tarafdan Andon oğlu Nikola zimmî dükkânı ve bir tarafdan yine Hatab meydanı ve bir tarafdan tarîk-i âm ile mahdûd fevkınde iki odasıyla bir bâb pirinçci dükkânı gediğinin iştirâken mâlikleri Apostol ve Kiryako ve Karasol zimmîler ve yine İstanbul Ağası kurbünde Köşe başında vâki‘ bir tarafdan Açık meydan ve bir tarafdan yine hatab meydanı ve bir tarafdan diğer pirinçci dükkânı ve bir tarafdan tarîk-i âm ile mahdûd fevkınde bir odasıyla bir bâb pirinçci mahzeni gediğinin mâliki Arab Ali Ağa ve Balıkpazarı kapısı dâhilinde Rüstempaşa kurbünde Çukur Han karşısında kâin bir bâb kârgîr pirinçci mahzeni gediğinin mâliki pirinçci Ali Ağa ve mârrü’z-zikr Çukur Han tahtında vâki‘ bir bâb kârgîr pirinçci mahzeni gediğinin mâliki pirinçci el-Hâc Mehmed Ağa ve Kizir Hanı tahtında sarrâf karşısında kâin bir bâb kârgîr pirinçci mahzeni gediğinin mâliki pirinçci Molla Ahmed ve yine zikr olunan Kizir Hanı kurbünde Laz Hanı tahtında vâki‘ bir bâb kârgîr pirinçci mahzeni gediğinin mâlikesi Kalemtraşçı el-Hâc Hüseyin Ağa kerîmesi Emine Molla ve Gürcü Hanı tahtında vâki‘ bir bâb kârgîr pirinçci mahzeni gediğinin mâliki Mirzezâde Molla Süleyman işbu on altı bâb mahzen ve dekâkin derûnlarında mevcûde gedikleri ez-kadîm esnâf beynlerinde pirinçci gediği olarak mer‘î ve mu‘teber ve her birilerinin yedlerinde irsen ve şirâen mülkleri olup dekâkin ve mehâzînde bey‘ eyledikleri erzâk bakkāl metâ‘ı olmağla bakkāl ve sabuncu gedikleri misillü emvâl-i tüccâra mu‘âdil ve mâl-ı ticâreti muhâfaza lâzıme-i hâlden olmağla gedik ashâbından biri müflisen firâr veyâhûd fevt oldukda gedikleri bey‘ olunup düyûnu var ise dâyinlerine edâ olunup düyûnu yoğise veresesine irs-i şer‘le mîrâs olunup bu sûretde tüccâr dahi emvâlinin telef ve izâ‘a olmayacağını mülâhaza birle i‘timâd-ı küllî tahsîl ve mâllarını ashâb-ı gedikden dirîğ etmeyip ve bu vechile ibâdullâha menâfi‘-i vefîre hâsıl olacağı mülâhazadan ba‘îd olmamakla bu misillü gedik ashâbı kirâ-i kadîmelerini mutasarrıflarına bilâ-ta‘allül mâh be-mâh edâ ve teslîm eyledikçe kirâ artırmak sevdâsıyla ihrâç ve âhar bahâne ile rencîde olunmamak şurût-ı esnâfdan olmağla merkūmûnun dahi müste‘cir oldukları bâlâda mezkûr odahâ ve dekâkin ve mehâzinin mülk ashâbına kirâ-yı kadîmelerini bilâ-ta‘allül mâh be-mâh edâ eyledikçe kirâ artırmak ve yâhûd âhar bahâne ile ihrâçlarına tasaddî olunmamaları için mâlik oldukları gedikleri esmânı misillü kalemine kayd ve yedlerine başka başka sûret i‘tâsını istirhâm eyledikleri İstanbul Mahkemesi’nden huzûr-ı âlîlerine i‘lâm olundu. Fî-gurreti Saferi’l-hayr sene 1123