İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 245 Hüküm no: 213 Orijinal metin no: [27b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa dikicibaşılıktan azl ve yerine Seyyid Osman Ağa’nın tayin olunması Dikicibaşı nasbı Ma‘rûz Âsitâne-i sa‘âdet ve tevâbi‘i olan Bilâd-ı selâse’de mevcûd bi’l-cümle haffâfân esnâfının Başkethudâsı el-Hâc İbrahim Ağa ve Topçular Kethudâsı es-Seyyid Hasan Ağa ve Yiğitbaşıları Hüseyin Efendi ve ustalarından Ali Efendi ve Hüseyin Efendi ve Mehmed Ağa ve Hüseyin Ağa ve es-Seyyid Hasan Ağa ve tâcirler kethudâsı İsmail Ağa ve Yiğitbaşıları Mustafa Ağa ve ustalarından Mehmed Efendi ve Bahçecizâde Ahmed Efendi ve es-Seyyid el-Hâc Hafız Mehmed Efendi ve el-Hâc Mustafa Ağa ve es-Seyyid Hasan Ağa ve Ârif Ağa ve Osman Ağa ve Mehmed Sadık Ağa ve el-Hâc Hasan Ağa ve Murtaza Ağa ve el-Hâc Osman Ağa ve Mustafa Ağa ve Süleyman Ağa ve Abdulkādir Ağa ve diğer Hasan Ağa ve âhar el-Hâc Osman Ağa ve Karaman Arastası Kethudâsı Hafız Mustafa Efendi ve Yiğitbaşıları Mustafa Ağa ve Pabûşçu esnâfının Müslim Köse Ustalarından Ebûbekir ve ihtiyârlarından Hüseyin ve İsmail ve Süleyman ve Çizmeciler Köşe Ustası Ahmed ve ihtiyârlarından Abdullah ve es-Seyyid İbrahim ve Şehzâdebaşı Köşe ustası Ahmed ve Mehmed ve Eski Ali Paşa Köşe Ustası Hasan ve Mehmed ve Hüseyin ve Karagümrük Köşe Ustası Emin Ağa ve Abdi ve Ömer ve re‘âyâdan Pabûşçu Köşe ustalarından Çatal Han Köşe Ustası Agob Şehzâdebaşı Köşe Ustası Vartan ve Sultan odaları köşe ustası Serkiz ve Kapan-ı dakīk Köşe Ustası Anparsun ve Mercan Hanı Köşe Ustası Ağya ve Dülbendçi Câmi‘i nâm mahal köşe ustası Asvador ve Langa Köşe Ustası Bedros ve Takyeci Hanı Köşe Ustası Minas ve Vezir Hanı Köşe Ustası Artin ve Sultanhamamı Köşe Ustası Bıdık ve Karaman Köşe Ustası Pelik ve Kumkapı Köşe Ustası Karanfiloğlu Bağdisar ve Ali Paşa Hanı Köşe Ustası Mardıros ve Rum tâifesi Köşe Ustalarından Sava ve Tarandafil ile bi’l-cümle ustaları olup beş yüz neferden mütecâviz Müslim ve re‘âyâ meclis-i şer‘-i münîrde sâbıkā dikicibaşı bâ‘isü’l-i‘lâm es-Seyyid el-Hâc Osman Ağa b. Ahmed muvâcehesinde cümlemizin ihtiyârıyla bâ-berât-ı âlî hâlâ dikicibaşımız olan Süleyman Ağa b. Süleyman hâzır olduğu hâlde her biri takrîr-i kelâm edip hâzır-ı mezbûr Süleyman Ağa bir müddetden beri dikicibaşı olup etvâr ve harekât-ı nâ-marzıyesinden bir vechile hoşnûd ve râzılar olmayıp umûr-ı esnâfı dâimâ nizâm-ı kadîm-i mer‘iyemize tatbîk ile tanzîm ve tesviye şurûtuna ri‘âyet edemeyip dâimâ bizleri ta‘cîz ve tecrîm ve tekdîr etmekle bir vechile kendüden hoşnûd ve râzı olmadığımıza binâen dikicibaşılıkdan azl ve ihrâc ve yerine cümlemizin müntahab ve muhtârımız olan işbu mezbûr es-Seyyid el-Hâc Osman Ağa örf ve âdet-i esnâfımıza ârif ve şurût-ı nizâmımıza vâkıf ve hâmiş-i arzuhâlde mastûr derkenâr olunan fermân-ı âlî-şânın tenfîz ve icrâsına sâ‘î ve her vechile dikicibaşılık-ı mezkûr uhdesinden gelmeğe kādir emîn ve müstakīm olduğu indimizde zâhir olmağla mezbûr es-Seyyid el-Hâc Osman Ağa Dikicibaşı nasb ü ta‘yîn olunması matlûbumuzdur deyü her biri istid‘â eylediklerinde merkūm Süleyman Ağa dikicibaşılık-ı mezkûrdan azl ve ihrâç birle yerine merkūm es-Seyyid el-Hâc Osman Ağa kıbel-i şer‘den dikicibaşı nasb ü ta‘yîn olundukda ol dahi kabûl ve hizmet-i lâzımesini kemâ-yenbagī rü’yet ve edâya ba‘de’t-ta‘ahhüd hâzır-ı mezbûr Süleyman Ağa birkaç kimesneleri kendüye terfîk edip i‘ânetleriyle yine dikicibaşılık-ı mezkûr kendüye ibkā olunması dâ‘iyesiyle bâ-arzuhâl Bâb-ı âsafî’ye iştikâ eylediğinde tarafeyn huzûrunuza celb ile bi’l-istintâk iktizâsını i‘lâm eyleyesin deyü bu dâ‘îlerine hitâben tekrar emr-i âlî sâdır olduğuna binâen esnâf-ı merkūmûn huzûr-ı şer‘a celb olunduklarında şakī-i merkūmûn dahi mezbûr es-Seyyid Osman Ağa üzerine dikicibaşı nasb ü ta‘yîn olunduğuna râzı olmalarıyla bu sûretde mezbûr Süleyman Ağa’nın ref‘inden merkūm es-Seyyid el-Hâc Osman Ağa üzerine tevcîh ve yedine berât-ı şerîf-i âlî-şân sadaka ve ihsân buyurulmak iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 7 S sene 1223.