İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 249 Hüküm no: 215 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ereğli İskelesi ahalisinin zahirelerinin iskeleye indirilmesi ve gemilere yüklenerek İstanbul’a nakli hususu Kapan tüccârına dâir, Ma‘rûz “Kā‘ide-i kadîme ne vechiledir tahkīk ve keyfiyet ve muktezâsını i‘lâm eyleyesin” deyü bu dâ‘îlerine hitâben sâdır olan fermân-ı âlîlerine imtisâlen Ereğli İskelesi ahâlisi zirâ‘at ve hırâsetleriyle melûf olduklarına mebnî hâsıl olan zehâiri iskele-i mezbûreye tenzîl ve sefâine tahmîl ve Der-aliyye’ye nakletmeleri bâbında izin ve ruhsatı hâvî yedlerine i‘tâ olunan emr-i âlîde kapan tezkiresi i‘tâ oluna deyü musarrah olmadığından tezkire verilmeyip ol-vechile iskele-i mezbûreye sefâin gitmesinde usret olduğuna binâen istid‘âları üzere kapan-ı mezkûrdan tezkire verilmesi husûsu ve kā‘ide-i kadîme ne vechile olduğu li-ecli’t-tahkīk kapan tüccârından Kalafatzâde İsmail Ağa ve Bağdâdîzâde el-Hâc Mehmed Emin Ağa ve Veli Hacızâde Mehmed Ağa ve el-hâc Hasan Ağa ve Kırımî el-Hâc İsmail Ağa ve sâirleri hâzır oldukları hâlde istintâk olunduklarında iskele-i mezbûreye nüzûl eden zehâirin ekserîsi muhâlif mahallere sarfla telef ve izâ‘at olunduğuna binâen sinîn-i vâfireden berü iskele-i mezbûre sedd ü bend ve hâsılâtları Silivri iskelesine nakl olunmuş olup evvelâ küşâdı Âsitâne-i aliyye kilârı misillü Tekfurdağı ve Silivri iskelelerinin ta‘til ve ihtilâline bâ‘is olduğundan mâ‘adâ tezkire i‘tâsı husûsu ancak kefîlli ve fermânlı kapan tüccârlarına i‘tâ, onlar dahi Bahr-ı siyâh iskelelerine irsâl edegelip kā‘ide-i kadîmemiz minvâl-i muharrer üzere olmağın bizler iskele-i mezbûreye sefâin göndermeyiz ve berrânî tâifesine izin verildiği sûretde dahi ahz eyledikleri zehâiri esnâ-yı râhda telef ve zâyi‘ edecekleri zâhir ve âşikâr olmağla ol-vechile tezkire i‘tâsında mahzûr-ı küllî ve de’b-i kadîme mugāyir olduğunu her biri ihbâr etmeleriyle bu sûretde tezkire verilemeyip lâkin ısdâr olunan emr-i mezkûrun kaydı terkīn ve adem-i terkīni re’y-i âlîlerine menût idüğü İstanbul Mahkemesi’nden huzûr-ı [âlîlerine i‘lâm olundu.] Fî 11 S sene 1223