İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 257 Hüküm no: 226 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Yusuf ve kardeşi Emine Hatun’un İnci Hanı hancısı Ali Ağa aleyhindeki menzil ve alacak davalarında anlaşma sağlanması 600 guruşa sulh Ma‘rûz Sâhibey-i arzuhâl zâtı mu‘arrefe Fatıma bt. Yusuf nâm hatun asâleten ve li-ebeveyn kız karındaşı Emine Hatun tarafından husûs-ı âtîde vekîl olduğu zâtını ârifân Mustafa Efendi b. Hasan ve İbrahim Edhem Ağa b. el-Hâc İbrahim nâm kimesneler şehâdetleriyle sâbit olan Mehmed Efendi b. Ali vekâleten Çarşamba günü Arz Odası’nda huzûr-ı hazret-i kāimmakām-ı âlî-makāmîde ma‘kūd meclis-i şer‘-i münîrde İstanbul’da İnci Hanı hancısı derûn-ı arzuhâlde mezkûrü’l-ism Ali Ağa b. Süleyman nâm kimesne mahzarında babamız olup bundan akdem vefât eden mezbûr Yusuf Ağa’nın hân-ı mezkûrda oda derûnunda mevzû‘ nakid iki bin guruş ve hân-ı mezkûrda vâki‘ taht-ı tasarrufunda olan bir bâb odadan hisse-i ma‘lûmesi ve arpa anbarları icâresinden seneteyn-i ma‘lûmede müctemi‘ üç bin guruş ki cem‘an beş bin guruş mezbûr Ali Ağa bi-gayrı hakkın ahz ü kabz eylediğinden mâ‘adâ zikr olunan oda hissesi ve arpa anbarları ve hân-ı mezkûr civârında kâin Taşdirek nâm mahâlde iki bâb sagīr menzilini fuzûlî zabt etmekle nakd-i merkūm ile sâlifü’l-beyân oda hissesi ve anbarlar ve menzilleri bize teslîme merkūm Ali Ağa’ya tenbîh olunmak bi’l-asâle ve bi’l-vekâle matlûbumuzdur deyü da‘vâ eylediğimizde ol dahi müdde‘âmızı külliyen inkâr birle beynimizde ba‘de vûkū‘i’l-münâza‘a bâ-vesâtet-i muslihîn beynimiz tevkīf ve ıslâh olunup biz ber-vech-i meşrûh tasaddî eylediğimiz da‘vâ-yı mezkûremizden mezbûr Ali Ağa ile bi’t-tav‘ ve’r-rızâ altı yüz guruş bedel-i medfû‘ ve makbûza bi’l-asâle ve bi’l-vekâle ba‘de akdi’l-musâlaha ve’l-kabûl bi’l-cümle zikr olunan husûslara ve mârrü’l-beyân oda hissesini ve anbarlar ve menzillere ve sâir cemî‘ hukūk-ı şer‘iyeye müte‘allika âmme-i de‘âvî ve mutâlebât ve kâffe-i eymân ve muhâsamâtdan bi’l-asâle ve bi’l-vekâle merkūm Ali Ağa’nın zimmetini ibrâ-yı âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîklerini İstanbul Mahkemesi’nden huzûr-ı [âlîlerine i‘lâm olundu.] Fî 17 S sene 1223.