İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 258 Hüküm no: 227 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Kostantin’in, Vasil v. Mihal aleyhindeki alacak davasında anlaşma sağlanması Francalacı fırını mâddesi Ma‘rûz Arzuhâl eden Francalacı Yani v. Kostantin nâm zimmî bi’d-defa‘ât Çarşamba günü Arz Odası’nda huzûr-ı hazret-i kāimmakām-ı âlî-makāmîde ma‘kūd meclis-i şer‘-i münîrde çukacı tâifesinden derûn-ı arzuhâlde mersûmü’l-ism Vasil v. Mihal nâm zimmî muvâcehesinde benim mersûm Vasil zimmî zimmetimde cihet-i karzdan alacak hakkım olan altı bin guruş ile ben bundan akdem Mahmudpaşa kurbünde vâki‘ müderrisîn-i kirâmdan Mehmed Seydâ Efendi’nin konağı derûnunda kâin francalacı fırınında francala tabh ve bey‘ etmemle efendi-yi mûmâ-ileyh beni fırın-ı mezkûrdan ihrâç dâ‘iyesinde iken mersûm Vasil zimmî beni fırın-ı mezkûrdan francalacılıkda ibkā etdirmek için bi-tarîki’r-rüşve malımdan bi-gayrı hakkın ahz eylediği iki bin guruş ki cem‘an sekiz bin guruş mersûm Vasil zimmetinden taleb ederim deyü da‘vâya tasaddî eylediğimde, ol dahi benim senin zimmetinde bâ-temessük cihet-i karzdan beş bin beş yüz guruş alacak hakkım vardır deyü benden da‘vâya tasaddî ve tarafeynden her birimiz âharın müdde‘âsını külliyen inkâr ve ol-vechile beynimizde ba‘de vukū‘i’l-münâza‘a bâ-vesâtet-i muslihîn beynimiz tevfîk ve ıslâh olunup ben ber-vech-i meşrûh tasaddî eylediğim de‘âvâ-yı mezkûremden mesfûr Vasil zimmî ile bi’t-tav‘ ve’r-rızâ iki bin iki yüz elli guruş üzerine ba‘de akdi’l-musâlaha ve’l-kabûl bedel-i sulh-ı mezbûrdan mâ‘adâ sekiz bin guruşa varınca ziyâdesi olan beş bin yedi yüz elli guruşa ve bi’l-cümle zikr olunan husûslara ve işbu târih-i i‘lâma gelince sâir beynimizde cereyân eden cemî‘ hukūk-ı şer‘iyeye müte‘allika mutlakan âmme-i de‘âvî ve mutâlebât ve kâffe-i eymân ve muhâsamâtdan mersûm Vasil zimmînin zimmetini, ol dahi kezâlik benden iddi‘â eylediği meblağ-ı merkūm beş bin beş yüz guruşa ve sâir cemî‘ hukūk-ı şer‘iyeye müte‘allika âmme-i de‘âvî ve kâffe-i mutâlebâtdan benim zimmetimi her birimiz şurût-ı müfside ve uhûd-ı mubtıladan ârî ve cebr ve kerhden hâlî ibrâ-yı âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt ve her birimiz ber-vech-i meşrûh âharın ibrâsını kabûl eyledik dedikde mukırr-ı müdde‘î-i mesfûr Yani zimmînin bi’l-cümle takrîr-i meşrûhunu mesfûr Vasil zimmî tahkīk ve tasdîk ve ber-vech-i muharrer kabûlü hâvî ibrâ eylediğini ve ibrâdan müstesnâ bedel-i sulh-ı merkūm iki bin iki yüz elli guruş zimmetinde müdde‘î-i mesfûra sahîhan deyni olduğunu bi-tamamihâ tâyi‘an ve kat‘iyyen ikrâr ü i‘tirâf etmeğin alâ-mûcib-i i‘tirâfihî bedel-i sulh-ı merkūm iki bin iki yüz elli guruşun müdde‘î-i mesfûra edâ ve teslîmle mezbûr Vasil zimmî ilzâm olunduğu İstanbul Mahkemesi’nden huzûr-ı [âlîlerine i‘lâm olundu.] Fî 10 S sene 1223.