İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 259 Hüküm no: 228 Orijinal metin no: [29b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kokas v. Bedros’un kızı Lusik’in, Artin v. Bedros ve eşi Yeprem aleyhindeki menzil davasında anlaşma sağlanması Gedikpaşa’da menzil mâddesi Ma‘rûz Bundan akdem hâlik olan Kokas v. Bedros nâm zimmînin sulbiye kızı derûn-ı arzuhâlde mersûmetü’l-ism şahsı mu‘arrefe Lusik nâm Nasrâniye bi’l-ma‘iye rü’yete memûr Nezâret-i hazret-i Sadâret-penâhîde âsûde evkāf müfettişi müderrisîn-i kirâm-ı zevi’l-ihtirâmdan Mehmed Ârif Eendi ile bi’d-defa‘ât Çarşamba günü Arz Odası’nda huzûr-ı hazret-i kāimmakām-ı âlî-makāmîde ma‘kūd meclis-i şer‘-i hatîrde sâhib-i arzuhâl Artin v. Bedros nâm zimmî kendi nefsinden asâleten ve zevcesi Yeprem bt. İstefan nâm Nasrâniye tarafından husûs-ı âtîde vekîl olduğu şahsını ârifân Melkon v. Kirkor ve Artin v. Manik nâm zimmîler şehâdetleriyle sâbit olmağla vekâleten muvâcehesinde nezâret-i hazret-i müşârün-ileyhde âsûde evkāfdan merhûm Bâli Paşa Vakfı musakkafâtından İstanbul’da Gedikpaşa mahallesinde Külhan karşısında kâin beher şehr yirmi akçe icâre-i müeccele ile ma‘lûmü’l-hudûd bir bâb menzil babam mersûm Kokas zimmînin bi’l-icâreteyn bâ-temessük-i mütevellî taht-ı tasarrufunda iken babam mersûm Kokas zimmî menzil-i mezkûru mersûm Artin zimmînin anası Kudret bt. Kigork Nasrâniyeye bâ-ma‘rifet-i mütevellî bin yüz doksan sekiz senesi Muharrem’i gurresinde ferâğ ve tefvîz, ol dahi tefevvüz ve kabûl etdikden sonra hâlike olup menzil-i mezkûr sadrî oğlu mesfûr Artin zimmîye âdiyen ba‘de’l-intikāl, ol dahi nısf-ı şâyi‘ini zevcesi müvekkile-i mesfûreye bâ-ma‘rifet-i mütevellî iki yüz on sekiz senesi Cumâdelâhiresi gurresinde ferâğ ve tefvîz, ol dahi tefevvüz ve kabûl edip ol-vechile menzil-i mezkûr zevcân-ı mezbûrânın bi’l-münâsafe taht-ı tasarruflarında olup lâkin babam mesfûr hîn-i ferâğında ma‘tûh olmağla ferâğ-ı mezbûrun adem-i sıhhatine binâen menzil-i mezkûrdan [30a] keff-i yed ve bâ-re’y-i mütevellî bana teslîme zevcân-ı mersûmetâna tenbîh olunmak matlûbumdur deyü da‘vâya tasaddî etmiş idim. El-hâletü hâzihî zevcân-ı mersûmân bana mallarından teberru‘an altı yüz guruş def‘ ü teslîm ve umûruma sarfla istihlâke emir eylediklerinde ben dahi yedlerinden tamamen ve kâmilen ahz ü kabz ve emirleri üzere umûruma sarfla istihlâk birle babam mersûm Kokas zimmînin ferâğ-ı mezkûrunu mücîze ve râzıye olduğumda mütevellî-i vakıf dahi mersûmânın tasarruflarını kemâ-kân re’y etmekle bi’l-cümle husûs-ı mezkûra ve menzil-i merkūm müdde‘âsına ve işbu târih-i i‘lâma gelince sâir cemî‘ hukūk-ı şer‘iyeye müte‘allika mutlakan âmme-i de‘âvî ve kâffe-i mutâlebâtdan zevcân-ı mersûmânın zimmetlerini onlar dahi bana medfû‘ları olan meblağ-ı merkūmun istirdâdına müte‘allika da‘vâdan benim zimmetimi her birimiz şurût-ı müfside ve uhûd-ı mubtıladan ârî ve cebr ve kerhden hâlî ibrâ-yı âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt ve her birimiz ber-vech-i meşrûh âharın ibrâsını kabûl edip bu vechile kat‘-ı nizâ‘ eyledik deyü ikrâr ve tasdîkleri İstanbul Mahkemesi’nden huzûr-ı âlîlerine i‘lâm olundu. Fî 10 S sene 1223.