İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 262 Hüküm no: 231 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un Ayşe bt. Mustafa’ya satmış olduğu evinin satış işlemi geçersiz olduğundan iade olunması Redd-i ferâğ Ma‘rûz Sâhibe-i arzuhâl mu‘arrefetü’z-zât Fatıma nâm-ı diğer Fatiş Hatun bt. Hüseyin meclis-i şer‘-i münîrde derûn-ı arzuhâlde mezkûretü’l-ism kezâlik zâtı mu‘arrefe Âişe bt. Mustafa nâm Hatun muvâcehesinde nezâret-i dâ‘îlerinde âsûde evkāfdan İstanbul’da Yedikule kurbünde Hâcı Evhad Câmi‘-i şerîfi Vakfı’nın mütevelliyesi kezâlik zâtı mu‘arrefe Şerife Zeliha Hatun hâzıra olduğu hâlde hâmiş-i arzuhâlde mastûr defter-i vakıfdan muhrec derkenâr nâtık olduğu üzere İstanbul’da Kocamustafapaşa kurbünde Ali Fakih mahallesinde kâin vakf-ı mezbûr musakkafâtından beher şehr otuz akçe icâre-i müeccele ile bir bâb vakıf menzil bâ-temessük-i mütevellî benim bi’l-icâreteyn taht-ı tasarrufumda iken ben menzil-i mezkûru bin iki yüz yirmi bir senesi Cumâdeâhiresi’nin yirmi ikinci günü beni ölünceye değin görüp gözetmek ve beslemek şartıyla mezbûre Âişe Hatun’a bâ-re’y-i mütevellî fâriğa olmuş idim. El-Hâletü hâzihî ferâğ-ı mezbûr şart-ı müfsid ile olduğuna binâen sahîh olmamağla menzil-i mezkûru geri red ve ferâğa mezbûre Âişe Hatun’a tenbîh olunmak matlûbumdur deyü mütevelliye-i hâzıra-i mezbûre Şerife Zeliha Hatun’un tasdîkiyle da‘vâ etdikde ol dahi kaziyye minvâl-i meşrûh üzere olduğunu bi-tamamihâ tâyi‘aten ve kat‘iyyen ikrâr ü i‘tirâf etmeğin mûcebince menzil-i mezbûru müdde‘iye-i merkūme Fatıma Hatun’a ferâğ-ı mezkûrun adem-i sıhhatine binâen geri red ve ferâğa mezbûre Âişe Hatun’a tenbîh olunup mütevelliye-i hâzıra-i mezbûre Şerife Zeliha Hatun dahi müdde‘iye-i mezbûrenin tasarrufunu re’y eylediği İstanbul Mahkemesi’nden huzûr-ı [âlîlerine i‘lâm olundu.] Fî 7 S. sene 1223.