İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 262 Hüküm no: 232 Orijinal metin no: [30a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat Eden Agob’un vârisleri arasında anlaşma sağlandığı Devoğluyokuşu’nda habbâz fırını ve değirmen Ma‘rûz İstanbul’da Devoğluyokuşu nâm mahâlde vâki‘ bir bâb habbâz fırını ve ona merbût Murad Paşa Değirmeni demekle meşhûr yedi horoslu bir bâb değirmen derûnunda mevcûde beyne’l-esnâf gedik ta‘bîr olunur yirmi sekiz re’s bârgir ve sâir âlât-ı lâzıme-i ma‘lûmenin yedi re’s bârgirine mâlik olup bundan akdem hâlik olan Agob v. Melkon nâm zimmînin verâseti sulbiye-i kebîre kızı Turfanda Nasrâniye ile li-ebin er karındaşları Bağdisar ve Mikâil zimmîlere münhasıra ve tashîh-i meselesi dört sehmden olup sihâm-ı mezbûrenin iki sehmi kızı mersûme Turfanda Nasrâniyeye ve birer sehmi karındaşları mesfûrân Bağdisar ve Mikâil zimmîlerden her birine isâbeti tahakkukundan sonra derûn-ı arzuhâlde mersûmetü’l-ism mesfûre Turfanda Nasrâniye taraflarından husûs-ı âti’l-beyânda vekîl olduğu şahsını ârifân Artin v. Kasbar ve Kalos v. Vartan nâm zimmîler şehâdetleriyle sâbit olan sâhib-i arzuhâl Anbarsun v. Arakil nâm zimmî meclis-i şer‘-i hatîrde sâlifü’l-beyân yedi re’s bârgire vaz‘-ı yedleri mütehakkık olan kezâlik derûn-ı arzuhâlde isimleri mastûr mesfûr Bağdisar zimmî asâleten ve mersûm Mikâil zimmî tarafından husûs-ı âtîde vekîl-i sâbitü’l-vekâlesi Mardıros v. Arakil zimmî muvâcehelerinde habbâzân kethudâsı Mustafa Ağa ve bi’l-cümle nizâm ustaları hâzır oldukları hâlde bâlâda tafsîl ü beyân olunan yedi re’s bârgir ve ona isâbet eden sâir âlât-ı lâzıme-i ma‘lûmeler hâlik-i mesfûr Agob zimmînin sağlığında ile’l-helâk yedinde mülkü olup ba‘de helâkihî üç buçuk re’s bârgir hissesi kızı müvekkilem mersûmeye mevrûs olmuş iken mersûmân mârrü’l-beyân yedi re’s bârgiri fuzûlî zabt ve bi-gayrı hakkın vaz‘-ı yed etmeleriyle keff-i yed birle üç buçuk re’s bârgir ve âlât-ı lâzımesini müvekkilem mersûme için bana teslîme zimmîyân-ı mersûmâna tenbîh olunmak bi’l-vekâle matlûbumdur deyü da‘vâya tasaddî eylediğimde onlar dahi cevâblarında hâlik-i mesfûr Agob zimmî [30b] sağlığında zikri mürûr eden yedi re’s bârgir ve âlât-ı lâzımesinin iki re’s bârgirini bana ve iki re’s bârgirini karındaşım müvekkil-i mesfûr Mikâil zimmîye bi-tarîki’l-hibe vermiş idi deyü beni def‘a tasaddî eylediğinde beynimiz tevfîk ve ıslâha havâle olundukda kethudâ ve nizâm ustaları ma‘rifetleriyle beynimize muslihûn tavassut edip ben ber-vech-i meşrûh bi’l-vekâle tasaddî eylediğim üç buçuk re’s bârgir müdde‘âmdan mesfûrân ile bi’t-tav‘ ve’r-rızâ üç re’s bârgir üzerine bi’l-vekâle sulh olduğumda onlar dahi bi’l-asâle ve bi’l-vekâle sulh-ı mezkûru kabûl ve zikri mürûr eden üç re’s bârgiri müvekkilem mersûme Turfanda Nasrâniye için bana def‘ ü teslîm, ben dahi yedlerinden bi’l-vekâle ahz ü kabz edip mâ‘adâ nısf bârgir müdde‘âsına müte‘allika da‘vâdan mersûmân Bağdisar ve Mikâil zimmîler ile vekîl-i mesfûr Mardıros zimmînin zimmetlerini kabûllerini hâvî bi’l-vekâle ibrâ ve iskāt edip bu vech ile kat‘-ı nizâ‘ eyledik deyü ikrâr ve tasdîkleri İstanbul Mahkemesi’nden huzûr-ı [âlîlerine i‘lâm olundu.] Fî 15 S sene 1223.