İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 264 Hüküm no: 233 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agob v. Sagar’ın tüccar Ahmed Ağa aleyhindeki alacak davasından feragat etmesi Kiraz çubuğu semeni da‘vâsı Ma‘rûz Arzuhâl eden Agob v. Sagar nâm zimmî meclis-i şer‘-i hatîrde derûn-ı arzuhâlde mezkûrü’l-ism tüccârdan Ahmed Ağa b. Ömer nâm kimesne muvâcehesinde benim mezbûr Ahmed Ağa zimmetinde bundan akdem yedimden ve malımdan iştirâ ve kabz eylediği aded ve fiyâtı beynimizde ma‘lûm kiraz çubuğu semeninden bin üç yüz guruş ve beher zirâ‘ı üçer buçuk guruşa olmak üzere kezâlik yedimden ve malımdan iştirâ ve kabz eylediği altı yüz zirâ‘ sûzenî işleme bogasi semeninden iki bin yüz guruş ki cem‘an üç bin dört yüz guruş alacak hakkımın yedi yüz elli guruşunu bana edâ ve teslîm, ben dahi yedinden ahz ü kabz etmemle bâkīsi olan iki bin altı yüz elli guruşu mezbûr Ahmed Ağa’dan hâlâ taleb ederim deyü da‘vâ eylediğimde ol dahi cevâbında eşyâ-yı muharrere-i mezkûreyi ancak kabzımı mu‘terif olduğum meblağ-ı merkūm yedi yüz elli guruşa iştirâ ve ahz eylediğini ikrâr mâ‘adâ müdde‘âmı inkâr etmekle ben ber-vech-i muharrer tasaddî eylediğim meblağ-ı bâkī-i merkūm iki bin altı yüz elli guruş müdde‘âmdan meccânen fâriğ olup bi’l-cümle husûs-ı mezkûra ve sâire müte‘allika âmme-i da‘vâdan mezbûr Ahmed Ağa’nın zimmetini ibrâ-yı âmm-ı sahîh-i şer‘î ile ibrâ ve iskāt eylediğimde ol dahi ibrâ-yı mezkûrumu kabûl eyledi deyü ikrâr ve tasdîkleri İstanbul Mahkemesi’nden huzûr-ı [âlîlerine i‘lâm olundu.] Fî 12 S sene 1223. [Şühûdü’l-hâl:] Esirci el-Hâc İbrahim Ağa, el-Hâc Emin Ağa, Hasan Efendi, Fincancı Hancısı Mehmed Ağa, Han-ı mezbûrda İbrahim Beşe, Kahveci Mustafa Beşe, Ketânî Ali Ağa.