İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 264 Hüküm no: 234 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fındıkzade Hacı İbrahim’in kızı Ümmügülsüm’ün, Abdullah’ın vasisi Seyyid Mehmed Haşim’e dükkân hissesini kiralaması Küçükkaraman’da kasab Ma‘rûz İstanbul’da Çarşambapazarı kurbünde sâkine mevâlî-i i‘zâmdan merhûm Fındıkzâde el-Hâc İbrahim Efendi kerîmesi zâtı mu‘arrefe Ümmügülsüm Hanım meclis-i şer‘-i münîrde kasab ustalarından olup bundan akdem vefât eden el-Hâc Mehmed Emin Ağa’nın sulbî oğlu Abdullah nâm sagīrin vasîyy-i mansûbu es-Seyyid Mehmed Haşim Ağa b. es-Seyyid el-Hâc Mehmed Emin nâm kimesne mahzarında İstanbul’da Küçükkaraman nâm mahâlde vâki‘ bir bâb vakıf kasab dükkânı benimle gāibân ani’l-meclis es-Seyyid Emrullah Ağa ve Lübâbe Hatun bt. Ahmed’in bâ-temessük-i mütevellî bi’l-icâreteyn islâsen taht-ı tasarrufumuzda ve derûnunda mevcûde Hudâvendigâr-ı esbak cennet-mekân firdevs âşiyân Gāzi Sultan Abdülhamid Han -tâbe serâhû- hazretlerinin vakf-ı şerîflerinden beyne’l-esnâf gedik ta‘bîr olunur âlât-ı lâzıme-i ma‘lûme sagīr-i mezbûrun babasından müntakil bâ-temessük-i mütevellî taht-ı tasarrufunda ve dükkân-ı mezkûrun kirâ-yı kadîmi olan şehriye üç yüz paradan benim sülüs hisseme isâbet eden yüz parayı bu âna kadar müstecir bulunanlardan mâh be-mâh ahz ü kabz edegelmiş iken bu def‘a vasîyy-i merkūm es-Seyyid Mehmed Haşim Ağa bana altmış altı para iki akçe teklif etmekle dükkân-ı mezkûrun kirâ-yı kadîmi olan beher şehriye yüz parayı bi’l-vesâye mâh be-mâh ke’l-evvel bana edâya vasîyy-i merkūm es-Seyyid Mehmed Haşim Ağa[ya] tenbîh olunmak matlûbumdur deyü da‘vâ eylediğimde vasîyy-i merkūm dahi cevâbında dükkân-ı mezkûrun kirâ-yı kadîmi eğerçi şehriye üç yüz para olup lâkin dükkân-ı mezkûrun bir cânibinde gāib ani’l-meclis Sarrâf Parsam v. Karabet zimmî müsteciren mütemekkin olup kasab dükkânı için şehriye iki yüz para ve sarrâf gāib-i mesfûr yüz para ki cem‘an üç yüz para seninle müştereklerin gāibân-ı merkūmâna ale’s-seviye mâh be-mâh her birinize yüzer para edâ olunagelmiş iken bu esnâda sarrâf-ı mersûm dükkân-ı mezkûr mahâllinden hurûc ve âhar mahalle nakletmekle binâen-aleyh şehriye iki yüz para hesâbı üzere senin sülüs hissen için altmış altı para iki akçe veririz, eğer sarrâf-ı mersûmun mütemekkin olduğu mahâlli dahi dükkân-ı merkūma zamla sagīr-i merkūm için bana îcâr eder iseniz yine üç yüz paraya istîcâr ederim dedikde ben dahi dükkân-ı mezkûru sarrâf mahâlli ile ma‘an üç yüz para hesâbı üzere sülüs hissemi işbu târih-i i‘lâm-ı şehrî gurresinden beher şehr yüzer para icâre tesmiyesiyle sagīr-i merkūm için vasîyy-i merkūm es-Seyyid Mehmed Haşim Ağa’ya îcâr ve teslîm eyledim dedikde ol dahi ber-vech-i muharrer bi’l-vesâye istîcâr ve kabûl ve icâre-i mezkûreyi mâh be-mâh cevr ü ezâ etmeksizin mezbûre Gülsüm Hanım’a bi’l-vesâye edâya müte‘ahhid olup bu vechile kat‘-ı nizâ‘ eyledikleri İstanbul Mahkemesi’nden huzûr-ı [âlîlerine i‘lâm olundu.] Fî-gurreti S sene 1223.