İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 265 Hüküm no: 235 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine’nin, eşi Mehmed Beşe’den boşanması Tatlîk, Ma‘rûz Havâss-ı refî‘a kazâsına tâbi‘ Filorya karyesinde sâkine Şerife Emine bt. Ali nâm hatun meclis-i şer‘-i münîrde zevc-i mutallıkı Mehmed Beşe b. İbrahim nâm kimesne muvâcehesinde mezbûr Mehmed Beşe zevc-i dâhilim olup târih-i i‘lâmdan iki gün mukaddem beni tatlîk etmekle zimmetinde mütekarrir ve ma‘kūdün-aleyh olan yüz on altı buçuk guruş yirmi akçe mehr-i müeccelim ve nafaka-i iddet-i mu‘ayyene-i ma‘lûmem ve meûnet-i süknâm mukābelelerinde beynimizde bi’t-terâzî ta‘yîn olunan yirmi dört guruş kırk akçe ki cem‘an yüz kırk bir guruşu mezbûr Mehmed Beşe işbu meclis-i şer‘de bana def‘ ü teslîm, ben dahi yedinden tamamen ve kâmilen ahz ü kabz edip hukūk-ı zevciyete ve mezbûr Mehmed Beşe’nin yedinde olup bana teslîme müte‘ahhide olduğu on beş guruş kıymetli bir re’s düğeden mâ‘adâ sâir cemî‘ hukūk-ı şer‘iyeye müte‘allika mutlakan âmme-i de‘âvî ve kâffe-i mutâlebâtdan her birimiz âharın zimmetini ibrâ-yı âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde mukırra-i mezbûre Şerife Emine Hatun’un bi’l-cümle takrîr-i meşrûhasını mezbûr Mehmed Beşe tahkīk ve tasdîk ve ber-vech-i meşrûh kabûlü hâvî ibrâ eylediğini ve ibrâdan müstağnî zikri mürûr eden düğe yedinde mevcûd olduğunu bi-tamamihi tâyi‘an ve kat‘iyyen ikrâr ü i‘tirâf ve mezbûre Şerife Emine Hatun’a bi-aynihî teslîme ta‘ahhüd eylediği İstanbul Mahkemesi’nden huzûr-ı [âlîlerine i‘lâm olundu.] Fî 6 S sene 1223.