İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 266 Hüküm no: 236 Orijinal metin no: [30b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Dimitri’nin Emirgan’daki kasap dükkânı gediği hissesini ortağı Kasap Dimitri’ye satması Mîrgünoğlu’nda Kasab Ma‘rûz Hudâvendigâr-ı esbak cennet-mekân firdevs-âşiyân Gāzi Sultan Abdülhamid Han -aleyhi’r-rahmetü ve’l-gufrân- hazretlerinin evkāf-ı şerîfelerinden mahrûse-i Galata’ya muzâfe İstinye nâhiyesine tâbi‘ Mîrgünoğlu nâm mahâlde kâin bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısf-ı şâyi‘asına bâ-temessük-i mütevellî mutasarrıf olan Nikola v. Dimitri zimmî tarafından husûs-ı âtîde vekîl olduğu es-Seyyid Feyzullah b. es-Seyyid Abdurrahman ve es-Seyyid Mustafa b. es-Seyyid Ali nâm kimesneler şehâdetleriyle sâbit olan Yani v. Kosta zimmî meclis-i şer‘-i münîrde hâlâ Hâssa kasabbaşısı izzetlü Osman Ağa tarafından mürsel kasablar kethudâsı Süleyman Ağa ve sâir kasab ustaları hâzır oldukları hâlde gedik-i mezkûrun nısf-ı âharına mutasarrıf olan bâ‘isü’l-i‘lâm Kasab Dimitri v. Yani zimmî muvâcehesinde bi’l-vekâle takrîr-i kelâm edip sâlifü’l-beyân gedik ta‘bîr olunan âlât-ı lâzıme-i ma‘lûmeden müvekkilim mersûm Nikola zimmî mutasarrıf olduğu nısf hisse-i şâyi‘asını hüsn-i rızâ ve tayyib-i hâtırı ve ferâğ-ı mu‘teber-i kat‘î ile bedel-i ma‘lûm ve makbûz mütâlebesinde bâ-re’y-i mütevellî mersûm Dimitri zimmîye [31a] ferâğ ve tefvîz eylediğinde ol dahi ber-vech-i muharrer tefevvüz ve kabûl edip ba‘de’l-yevm zikri mürûr eden nısf kasab gediği dahi mersûm Dimitri zimmînin dâhil-i havza-i tasarrufu olup müvekkilim mersûmun kat‘a alâka ve medhali kalmamışdır deyü bi’l-vekâle ba‘de’l-ikrâr ve’t-tasdîk nısf gedik-i mezkûr dahi müvekkil-i mesfûr Nikola zimmî ferâğından müştereki mersûm Dimitri zimmî üzerine defter-i vakf-ı şerîf ba‘de’l-kayd müştereki mersûmun temessükü hâmişine tahrîr ve mecmû‘-ı gedik tasarrufu için mersûm Dimitri zimmî yedine temessük i‘tâsını istid‘â eylediği İstanbul Mahkemesi’nden huzûr-ı [âlîlerine i‘lâm olundu.] Fî 16 S sene 1223.