İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 271 Hüküm no: 242 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed Sadık Ağa’nın Yağkapanı esnafına reis ve nazır tayin olunması Yağkapanı nâzırı nasbı. Ma‘ruz, Âsitâne-i aliyye’de Sebzehâne kurbünde vâki‘ revgan-ı zeyt tüccârından es-Seyyid el-Hâc Mustafa Ağa ve es-Seyyid el-Hâc Ali Ağa ve Hafız el-Hâc Mehmed ve es-Seyyid Halil Ağa ve İsmail Ağa ve Hasan Ağa ve sâir bi’l-cümle ehl-i İslâm ve ehl-i zimmet meclis-i şer‘-i münîrde tüccâr-ı mezbûrdan el-Hâc Mehmed Sadık Ağa mahzarında işbu yedimizde olup bin iki yüz bir senesi Cemâziyelevvel’inin yirmi dördüncü günü târihiyle müverrah ve ol târihde İstanbul kādısı olup bundan akdem irtihâl-i dâr-ı bekā eden fazîletlü Mustafa Aşir Efendi hazretlerinin hatmiyle mahtûm bir kıt‘a i‘lâm nâtık olduğu üzere yedimizde mevcûd ve taşradan vürûd edecek revganı isrâf ve bilâ-muktezî tama‘-ı hâmından nâşi eyyâm-ı kalîlde bey‘le itlâf etmeyip vakit ve hâle göre ale’t-tedrîc bey‘ ve bir tarafdan istihzâra bezl-i himmet ve ibâdullâha hizmet ve tahsîl-i rızâ-yı veliyyü’n-ni‘amîde sa‘y ve dikkat edip umûr-ı mezkûremizde kemâl-i kıyâm ve ihtimâm ve istihkâm olunmak için mezbûr el-Hâc Mehmed Sadık Ağa cümlemiz üzerine reis ve nâzır nasb olunup biz dahi ona ittibâ‘ ve inkıyâd ve içimizden hilâf-ı şurût hareket eder bulunur ise tedîbe râzı olmuş idik. Lâkin birkaç mâhdan beri merkūm el-Hâc Mehmed Sadık Ağa umûrumuza karışmadığına mebnî taşradan revgan-ı mezkûr vürûdunda isrâf ve bilâ-muktezî eyyâm-ı kalîlde bey‘le itlâf olunmağla el-hâletü hâzihî merkūm el-Hâc Mehmed Sadık Ağa yine ke’l-evvel cümlemiz üzerine reis ve nâzır nasb ü ta‘yîn olunması murâdımızdır dediklerinde merkūm el-Hâc Mehmed Sadık Ağa tüccâr-ı mezbûrûn üzerine kıbel-i şer‘den kemâ-kân reis ve nâzır nasb ü ta‘yîn olundukda ol dahi kabûl ve hizmet-i lâzımesini kemâ-yenbagī edâya ta‘ahhüd ve iltizâm eylediği İstanbul Mahkemesi’nden huzûr-ı [âlîlerine i‘lâm olundu.] Fî 15 S sene 1223.