İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 272 Hüküm no: 243 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kokas v. Kirkor’un sahibi olduğu tütüncü dükkânı gediği kaydının nakli Galata’da Tütüncü, Ma‘rûz Hâmiş-i arzuhâlde mastûr derkenâr nâtık olduğu üzere Ma‘den Kalemi’nde mukayyed ve mu‘teber gediklerden olup mahrûse-i Galata’da Kemeraltı nâm mahâlde köşe başı karşısında kâin Zotori zimmî dükkânı demekle ma‘rûf bir bâb tütüncü dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin mutasarrıfı Kokas v. Kirkor nâm zimmî meclis-i şer‘-i münîrde dühancı esnâfının kethudâları İbrahim Ağa b. Ahmed ve Yiğitbaşıları es-Seyyid Abdullah ve esnâf-ı mezbûrenin müsinn ü ihtiyârlarından Galata Kethudâ Vekîli Mustafa Ağa ve Bandırmalı es-Seyyid Mustafa Ağa ve Mustafa Efendi ve sâir mazbutü’l-esâmî ustalar hâzır oldukları hâlde Kazanikli? Yuvan v. Maril nâm zimmî muvâcehesinde tedâvül-i eyâdî ile mülküm olan âlât-ı lâzıme-i ma‘lûmeyi kethudâ-yı mezbûr ve ustalar ma‘rifetleriyle mersûm Yuvan zimmîye yüz guruş semen-i medfû‘ ve makbûza bâtten ve sahîhan bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl edip mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini kabûlü hâvî ibrâ ve iskāt edip ba‘de’l-yevm gedik-i mezkûrda benim aslâ ve kat‘a alâka ve medhalim kalmayıp mesfûr Yuvan zimmînin mülk-i müşterâsı olmuşdur deyü ba‘de’l-ikrâr ve’t-tasdîk müşteri-yi mesfûr Yuvan zimmî meclis-i şer‘de takrîr-i kelâm edip gediğini iştirâ eylediğim dükkân-ı mezkûr muhterik olup mülk sâhibine arsasının lüzûmu olmağla gedik-i merkūm civârında vâki‘ âhar dükkâna nakl olunmak şurût-ı mer‘iyeden olmağla iştirâ eylediğim âlât-ı mezkûreyi mahrûse-i mezbûrede muhterik tütüncü dükkânı kurb ve civârında Sava zimmî şerbethânesi karşısında Domuzhan ittisâlinde Kalyoncu Ali Çavuş b. Mehmed’in menzili tahtında vâki‘ şehriye altışar guruş kirâ ile müşâhereten müsteciri olduğum kimesnenin gediği olmayan bir bâb dükkâna nakl ve ber-vech-i muharrer Ma‘den Kalemi’ne kayd olunmak murâdımdır dedikde bu misillü muhterik tütüncü dükkânı arsası mülk sâhibine lüzûmu oldukda tütüncü dükkânı gediğinin nakli şurût-ı mer‘iyelerinden olduğunu kethudâ ve yiğitbaşı ve ihtiyârları merkūmûn haber vermeleriyle mârrü’z-zikr Kemeraltı nâm mahâlde köşe başı karşısında olan muhterik dükkân ba‘de’l-yevm tütüncü dükkânı olmamak şartıyla gediği kurb ve civârında Sava zimmî şerbethânesi karşısında Domuzhan ittisâlinde Kalyoncu Ali Çavuş’un menzili tahtında olan dükkân-ı mezkûrda mu‘teber olmak üzere dükkân-ı evvelin gedik kaydı ilgā Zotori zimmî üzerinden ref‘ ve terkīn ve mahâll-i sânîde mesfûr Kazanikli Yuvan zimmî üzerine kayd birle yedine sûret i‘tâ olunmak iktizâ eylediği İstanbul Mahkemesi’nden huzûr-ı [âlîlerine i‘lâm olundu.] Fî 17 S sene 1223.