İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 279 Hüküm no: 247 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hacı Abdi Molla’nın, Şerife Emine aleyhindeki alacak davasında anlaşma sağlanması 70 guruşa sulh Ma‘rûz Sâhib-i arzuhâl es-Seyyid el-Hâc Abdi Molla b. es-Seyyid Abdullah Hâzım Efendi bi’t-terâzî meclis-i şer‘-i münîrde derûn-ı arzuhâlde mezkûretü’l-ism mu‘arrefetü’z-zât Şerife Emine Hanım bt. es-Seyyid el-Hâc Mehmed Efendi mahzarında benim mezbûre Şerife Emine Hanım zimmetinde işbu yedimde olup bin iki yüz on üç senesi Şevvâli’nin on beşinci günü târihiyle müverrah bir kıt‘a temessük mantûkunca cihet-i karzdan dört yüz elli guruş alacak hakkım olmağla meblağ-ı merkūmu mezbûre Şerife Emine Hanım’dan taleb ederim deyü tasaddî eylediğim da‘vâmdan bâ-vesâtat-ı muslihîn mezbûre Şerife Emine Hanım ile bi’t-tav‘ ve’r-rızâ an-inkâr yetmiş guruş üzerine sulh olduğumda ol dahi sulh-ı mezkûru kabûl ve bedel-i sulh-ı mezkûr yetmiş guruşu işbu meclis-i şer‘de bana def‘ ü teslîm, ben dahi yedinden tamamen ve kâmilen ahz ü kabz edip ziyâdesi olan üç yüz seksen guruşa ve ammim olup işbu târihden on sekiz sene mukaddem verâseti zevcesi mezbûre Şerife Emine Hanım ile li-ebeveyn karındaşı Şerife Fatıma Hanım’a ve bana münhasıra olduğu hâlde vefât eden es-Seyyid el-Hâc Ahmed Efendi b. es-Seyyid Abdullah’ın kalîl ü kesîr [ve] celîl ü hakīr nukūd ve urûs akār ve menkūl, ma‘lûm ve mechûl bi’l-cümle ism-i mâl ıtlâk olunur terekesine ve hukūk-ı mîrâsa ve işbu târih-i i‘lâma gelince sâir cemî‘ hukūk-ı şer‘iyeye müte‘allika mutlakan âmme-i de‘âvî ve mutâlebât ve kâffe-i eymân ve muhâsamâtdan mezbûre Şerife Emine Hanım’ın zimmetini şurût-ı müfside ve uhûd-ı mubtıladan ârî ve cebr ü kerhden hâlî ibrâ-yı âmm-ı sahîh-i şer‘î ve iskāt-ı tamm-ı sarîh-i mer‘î ile ibrâ ve iskāt eylediğimde ol dahi ibrâ-yı mezkûrumu kabûl edip bu vechile külliyen kat‘-ı nizâ‘ eyledik deyü ikrâr ve tasdîkleri İstanbul Mahkemesi’nden huzûr-ı [âlîlerine i‘lâm olundu.] Fî 25 S sene 1223. [Şühûdü’l-hâl:] Kuzâtdan Feyzullah Efendi b. Ali, Habbâzlar Kethudâsı es-Seyyid Mehmed Ağa, Molla Ali b. Abdullah, Mehmed Ârif b. Mustafa muhzır, Molla Hasan b. Musa muhzır, Salih Odabaşı b. Mehmed muhzır, Hacı Ali muhzır, es-Seyyid Osman Çavuş b. Ebâbekir el-mübâşir.