İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 280 Hüküm no: 248 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıp olduğu anlaşılan Papasoğlu Kalos’un dükkânının açılarak içindeki eşyaların emanete verilmesi Uzunçarşı’da kîseci dükkânı güşâdı Ma‘rûz Sâdır olan fermân-ı âlîlerine imtisâlen savb-ı şer‘-i enverden irsâl olunan kâtib el-Hâc Mehmed Efendi dâ‘îleri İstanbul’da Uzunçarşı’da vâki‘ bir bâb kîseci dükkânında müşâhereten müstecir olup dükkân-ı mezkûru mukaffelen terk ve ta‘tîl ve bir seneden beri diyâr-ı âhara firâr ve gaybet-i munkatı‘a ile gāib ve mefkūd olan derûn-ı arzuhâlde mastûrü’l-ism Papasoğlu Kalos nâm zimmînin mütemekkin olduğu dükkâna varıp dükkân-ı mezkûr derûnunda mevcûde gedik âlât-ı lâzımesinin mâliki dükkân-ı mezkûrun kadîm müsteciri sâhib-i arzuhâl Dülbendçi Avanes v. Sekyas nâm zimmî ile esnâf-ı mezbûre kethudâsı Derviş Mehmed Ağa ve sâir mazbûtü’l-esâmî Müslim ve zimmîler hâzır oldukları hâlde dükkân-ı mezkûru feth ve küşâd ve derûnunda mevcûde on iki top üç çeyrek keten mumu ve beş top kaba sahan kolu dülbend ve altmış dört değirmi beyaz dülbend parçaları ve yedi top lekeli Moskov dülbendi ve beheri dokuzar değirmi on dokuz parça Karacasu mumusu ve üç buçuk top Yenikapı yemenisi ve altı top boyama keten ve dört top ensiz basma tensûh ve yirmi sekiz top Gediz bezi ve yetmiş bir top Çemişgezek astarı ve iki köhne minder ve bir köhne kilim ve bir sagīr çekmeceyi mefkūd-ı mersûmun hâlî mütebeyyin oluncaya değin hıfz olunmak üzere mu‘temed ve müstakīm olduğu bi’l-ihbâr mütehakkık olup kıbel-i şer‘den kayyum nasb olunan Kuyumcuoğlu Mardıros v. Avanes nâm zimmî yedine îdâ‘ ve teslîm eylediklerini mezbûr dâ‘îleri mahâllinde tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri İstanbul Mahkemesi’nden huzûr-ı [âlîlerine i‘lâm olundu]. Fî 26 S sene 1223.