İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 281 Hüküm no: 249 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal gediği sahipleri Yanaki ile kardeşi Despino’nun kiraladıkları dükkândan çıkarılmaması Topkapı’da Bakkāl Ma‘rûz Bakkāl tâifesinden Yanaki v. Kosta zimmî tarafından husûs-ı âtîde vekîl olduğu Ligori v. Yorgi ve Rizo v. Togodoş nâm zimmîler şehâdetleriyle sâbit olan Yani v. Yamandi ve kız karındaşı Despino bt. el-mersûm Kosta Nasrâniye tarafından kezâlik husûs-ı âtîde vekîl olduğu şahsını ârifân şâhidân-ı mesfûrân şehâdetleriyle sâbit olan âhar Yorgi v. Zahari nâm zimmîler meclis-i şer‘-i hatîrde kendi nefsinden asîl ve li-ebeveyn er karındaşı Ohannes v. Serope zimmî tarafından husûs-ı âtîde vekîl-i sâbitü’l-vekâlesi Kerupa zimmî muvâcehesinde Bakkālân Pazarbaşısı Süleyman Ağa ve Bölükbaşı es-Seyyid Ahmed ve sâir bi’l-cümle nizâm ustaları hâzır oldukları hâlde İstanbul’da Topkapı dâhilinde Çukurçeşme ittisâlinde kâin yedi kepenk bir bâb kadîm bakkāl dükkânı mersûmân Kerupa ve Ohannes zimmîlerin iştirâken ve şâyi‘an bi’l-icâreteyn bâ-temessük-i mütevellî taht-ı tasarruflarında ve dükkân-ı mezkûrda şehriye altışar guruş kirâ ile müvekkillerimiz mersûmân müşâhereten müstecir derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme müvekkillerim mersûmân Yanaki zimmî ve Despino Nasrâniyenin bi’l-münâsafe yedlerinde iştirâken ve şâyi‘an mülkleri olmağla mersûmân Kerupa ve Ohannes zimmîler bu esnâda dükkân-ı mezkûrun üç kepenk mahâllini kahvehâne ihdâsıyla âhara îcâr ve dört kepenk mahâllinde kendileri metâ‘-ı âhar bey‘iyle mütemekkin olup lâkin dükkân-ı mezkûr kadîm bakkāl olarak Başmuhâsebe’de mukayyed şurût-ı nizâmımızda dâhil ve bu makūle bakkāl dükkânı gedikleri mâl-ı tüccâra mukābil olduğundan bu vechile tebdîl ve tağyîr olunmayarak ta‘mîr ve termîmi iktizâ eyledikde mülk sâhibleri ke’l-evvel ta‘mîr ve tecdîd eylemeleri dahi bâ-fermân-ı âlî şurût-ı nizâm-ı mer‘iyemizde iken zimmîyân-ı mersûmân ber-vech-i meşrûh dükkân-ı mezkûru akār-ı âhara tebdîl etmeleriyle ke’l-evvel bakkāl dükkânı olarak müvekkillerim mersûmân îcâr etmek üzere mesfûrâna tenbîh olunmak bi’l-vekâle matlûbumdur deyü da‘vâ etdiklerinde husûs-ı mezkûr istikşâf-ı hâl için Pazarbaşısı ve Bölükbaşısı ve nizâm ustaları hâzırûn-ı mezbûrûndan istintâk olundukda hâl müdde‘iyân-ı mersûmânın takrîrlerine mutâbık olduğunu haber verdiklerinden sonra mersûm Kerupa zimmî dahi kaziyye minvâl-i meşrûh üzere olduğunu bi’l-asâle ve bi’l-vekâle ikrâr ü i‘tirâf ve ber-mûceb-i emr-i âlî dükkân-ı mezkûru gedik sâhibleri müvekkilân-ı mersûmân Yanaki zimmî ve Despino Nasrâniye kirâ-yı kadîmi üzere îcâr ve teslîme müte‘ahhid olup bu vechile kat‘-ı nizâ‘ eyledikleri İstanbul Mahkemesi’den huzûr-ı âlîlerine i‘lâm olundu. Fî 14 min-Safer sene 1223.