İstanbul Mahkemesi 94 Numaralı Sicil (H. 1222-1223 / M. 1807-1809) cilt: 85, sayfa: 283 Hüküm no: 251 Orijinal metin no: [33b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayak şerbetçileri esnafına ait olan emrin yenilenmesi Şerbetçi esnâfına dâir Ma‘rûz Sâdır olan fermân-ı âlîlerine imtisâlen işbu arzuhâl derkenâra nazar olundukda ashâb-ı arzuhâl Âsitâne-i aliyye’de vâki‘ ayakda şerbet satıcı tâifesinden şerbetçi esnâfına mülhak olup bundan akdem esnâf-ı mezbûre tecessüs olundukda seksen bir nefer Müslim ve yirmi bir nefer zimmî ve on dokuz nefer Yahûdî birbirlerine kefîl olarak ber-mûceb-i defter şerbetçi olup bundan ziyâde olmayıp ve boyalı ve ekşi şerbet satmayıp ve bal ve üzüm şerbeti ve sübyeyi dahi billûr kâse ve uzun boylu şişe ve bardak ile bey‘ etmeyip kadîmden olduğu üzere güğüm ile gezdirip tas ve kâse ile bey‘ edip iktizâ eden karı dahi şerbetçiler kethudâsı pazarından sonra? almak üzere usta dükkânlarından dahi ayak şerbetçi çıkmayıp ve muhdes dükkân ve fıskiye ve köşelerde destgâh olmamak üzere mukaddemâ re’y ve ittifâkımıza binâen taraf-ı şer‘den yedimize i‘lâm verilmiş iken ecânibden ba‘zı kimesneler bilâ-kefîl san‘atımıza karışıp nizâmımızın ihtilâline bâ‘is olmağla o makūleler men‘ ü def‘ olunmak üzere Dergâh-ı âlî Yeniçeri Ağası’na hitâben emr-i şerîf sâdır olmağın emr-i mezkûrun hilâfına dâir emir verilmeyip fi’l-vâki‘ husûs-ı mezbûr san‘at kabîlinden olup hâm-dest ve mechûlü’l-ahvâl kimesnelerin müdâhaleleri ihtilâl-i nizâmlarını mûcib bir keyfiyet olmağla bu makūleler üstâda hizmet edip ve pîr-perver oldukda kethudâ ve ustalar ma‘rifetiyle usta çıkıp kefîl vermedikçe san‘at-ı mezkûreye müdâhale olunmamak üzere işbu derkenâr olunan emr-i âlînin mazmûnunda şurût-ı mezkûreyi derc ile tecdîdinde mahzûr olmadığını kethudâ ve bi’l-cümle ustaları haber vermeleriyle ol-vechile emr-i mezkûrun tecdîdi re’y-i âlîlerine menût olduğu İstanbul Mahkemesi’nden huzûr-ı [âlîlerine i‘lâm olundu.] Fî 3 min-Ra sene 1223.